港府推出「終極」政改方案，京官一錘定音，泛民建議一概不接受，泛民主派隨即表明反對，政改方案通過機會似乎凍過水，然而政治係妥協的藝術，一日都嫌太長，冇人膽敢斷言政改方案必遭否決，有網民開出盤口，列出23個泛民議員轉軚支持政改嘅賠率，純屬斷估，絕不痛苦。
轉軚穩膽眾望所歸係民協馮檢基，熱到爆燈賠率僅1.001倍；其次係醫護界李國麟，一直盛傳五年前泛民六子轉軚，佢係其中之一，既有如此往績，難怪只得2.5倍。緊隨馮、李之後嘅大熱門，係被捧為「三甲之選」嘅社工界張國柱，由於佢亦係民協成員，轉軚機會看高一線，3.5倍賠率，冇屈機。冇咁熱嘅有湯家驊同梁耀忠，前者反公投倡溝通，後者亦係疑似被煲呔「袋」埋嘅一票，兩人賠率分別係4.5同6.5。網民評價湯大狀感情用事分分鐘脫腳，梁耀忠則臨場反覆，唔穩陣。
民主黨九個議員賠率不一
公民黨余若薇、吳靄儀，賠率都有999倍，正常；五個辭職議員更冷到9999倍，合理。呢個網民吹水賠率表，另一有趣之處係民主黨九個議員賠率不一，李華明、李永達、張文光比較熱，賠率僅5倍；甘乃威、鄭家富、黃成智，賠率由7.5倍至8.5倍不等，意味網民覺得佢哋都好有潛質轉軚，至於值唔值得吼，八方覺得宜睇多陣，暫無意見。
民主黨主席何俊仁綽號「鐵頭仁」，條頸未必咁硬淨，轉軚賠率10倍，視乎民主黨會員大會事態發展，冷敲無妨，重注不必。20倍嘅涂謹申則暫時唔使留意。該黨副主席劉慧卿係80倍大冷門，九人中最冷，正路計睇都無謂，不過網民指卿姐既然入得民主黨，當心佢老馬有火性情反常，橫掂買重幾個熱門冇肉食，搭埋卿姐，博好分啲，此乃黑馬之選咁話。
mailto:[email protected]