未開波就有世界盃「得獎名單」？唔係，只係橋王之王阿里巴巴（1688）又有噱頭賣吓廣告唧！阿里噚日根據全球買家由舊年5月至今年4月，響佢哋國際交易市場上面，搜索各個世界盃決賽周入圍隊伍相關足球產品嘅次數，而作出賽果預測。結果？梗係港人至愛英格蘭拎冠軍啦，亞軍係墨西哥，美國同意大利分別係季軍同殿軍！
產品最受網站買家歡迎
點解係英格蘭贏？阿里話，英格蘭嘅產品係阿里網站上面，最受全球買家歡迎嘅國家隊產品，佔32支決賽周隊伍相關產品搜索總數21%。另外，響阿里旗下個網上批發平台「全球速賣通」5月搞嘅世界盃推廣活動中，英格蘭以12930票成為世界盃得主。假如阿里呢個推斷賽果成真，唔知馬雲會唔會搞埋外圍呢？
李華華