高官總動員落區宣傳政改，煲呔前日去到筲箕灣商場，忽然做咗商場節目嘅特別嘉賓，企上台推銷政改，又振臂高呼「起錨」口號，佢嗌得口響，不過在場好多人卻面黑，嘀咕「有冇超錯」！
手停口停影響生計
原來呢個商場騷，係東區區議會贊助嘅休漁期活動，邀請漁民參加，宣傳休漁期間，漁船唔出海就要做好防盜、防火、防風措施，漁民得閒出席呢個「三防」活動，係因為冇得出海，煲呔卻到場喪嗌「起錨」，擺明贈興啫。漁民手停口停，休漁期無着落，生計大受影響，睇見高官無厘頭做政治騷，唔㷫就假！
前日落區鬧劇有幕荒謬場面，TVB新聞訪問一名市民，批評抗議政改方案嘅人激進，影響其他市民。有網民好眼利，認出呢位係非一般市民，而係新界社團聯會幹事王文傑，曾任城大學生會會長。王文傑當日點解在場，是否護駕高官，八方不猜測，不過佢有機會上電視，呢鋪出晒位就梗o架嘞。