繼警方喺時代廣場又拉又鎖民主女神像後，上星期五又發生集體強搶「民女」事件，當日六四燭光集會，好多人圍住支聯會檔口，就係為咗搶購小型民主女神像擺設，據八方了解，當晚總共賣出千幾個小型「民女」像，一次過將支聯會存貨清倉。
呢尊小型民女像以前銷情平平，今年警方動手扣押民主女神像，引發搶購潮，賣到一尊不剩㖭！支聯會90年首次推出小型民主女神像，沽清後97年再造第二批，13年才清倉，至於會否再造，以便日後應市，據講支聯會暫未有討論，事關要搵地方擺貨，要諗清楚物流安排先可以落柯打。平反六四要薪火相傳，既然好多後生仔未買「民女」返屋企，支聯會快啲補貨啦。