在江湖行走，竟敢宣稱「無敵」？哥哥仔，你係咪未死過?!細豐哥稱自己的金牌凍咖啡無敵於茶餐廳界，更新創超級無敵巨型農夫包，大到連隻雞都塞得入。作為鎮店之寶的「爆脆農夫包」原本已有三級制，大中細碼挑戰食神胸襟，卻想不到第四級一下子就彈上「籃球級」，直徑12吋！眾生嘩然，點食?!
記者：馮敏兒
攝影：陳盛臣、林栢鈞、馮敏兒
Model：Suki@PureModel
自稱「無敵」凍啡
無敵不是最寂寞，啡友的會心微笑，已經是即時回報，以茶記價錢（$15）有此水準，又的確難逢敵手。薄薄的一層麥斯威爾咖啡粉伏在浮冰之上，凍咖啡一上枱就伴隨一道命令：「唔准攪！」性感靚女即時發爛渣：「吓？連咖啡都唔俾我攪？起你錨o架！」細豐哥哈哈一笑：「你攪咗就真係『拋錨』喇！」原來攪咗就不再無敵，歸於平淡，「你慢慢享受傾偈，飲到半杯時才來攪，否則第一口會很濃，但當冰融化，便越飲越淡！」聽來十足愛情哲學。
第四級12吋農夫包
「澳門大豐新翠苑餐廳」的咖喱牛腩農夫包，早在朗豪坊旺角熟食中心的「澳門翠苑茶餐廳」時代已於OpenRice人氣十足。當年開人氣之先的主廚大豐哥（細豐親大佬）留下秘笈，自立門戶，繼續改良，農夫包依舊外脆內軟，既是碗也是飯，餸料除了各式咖喱，還有芝香白汁和香草茄汁。農夫包本分大中細三級制，近日推出的第四級別，竟然有接近12吋直徑，這個巨無霸，可以填入一整隻海南雞，佢話可以用來取代生日蛋糕！這個巨包要三日前預訂，如果外賣回家，則須要在焗爐以180℃焗10分鐘，為防焦乾每兩分鐘翻一次，微波爐唔得。巨無霸農夫包淨包都有得賣，用$30買個回去玩「私伙菜」都好型。連一般餡料的「初級版」售$56，但體積四倍的「四級版」才$98。
農夫包之父：20吋都得
原來他們的農夫包出自隱世高人，人稱「大佬」陳慶洲師傅的傑作。他是大豐的童年死黨，03年大豐拿來一個農夫包求他照辦煮碗，他依樣炮製，不過自己卻一次都未食過。直至他的農夫包成名後，他才拿往口中一試，「哈！果然幾好食。」神奇吧！現在也成了「澳門大豐」的老闆之一。最近大豐話要升級，要他試做一個有咁大得咁大的巨無霸，他在麪包廠找了隻最大的鐵兜，用了6個小時製作，在巨型焗爐焗足40分鐘，「籃球咁大！勁呀！哈哈哈！不過凍咗都有少少收縮。手頭無大鐵兜，否則更大都有，20吋吧，好等閒！」
四姨太嬲爆牛腩湯
大豐和細豐都是港式OldSchoolClassic水吧傳承，茶啡雙絕，十多年前細豐在「澳門茶餐廳」打工時改良的番茄牛腩粒湯，曾經令四姨太不惜坐直升機來港一嚐，卻因全部售罄無佢份而大發雷霆。細豐離開後，澳記無以為繼，反而佢一再改良，用足心機，一口濃湯成為從早餐到消夜全程最受歡迎Classic。提到OldSchool自然不能輕視一份火腿通粉的工藝，不過查資料發現他倆曾是本報飯堂的孖寶兄弟，勾起了很多同事懷念，對昔日黃金時代的嚮往！哈！
澳門大豐新翠苑餐廳（26683178）
地址：青衣牙鷹洲街8號灝景灣商場地下1號舖
