上星期約完工管汝出街，意猶未盡，今周再約另一台大十三妹「國企湄」帶路遊師大。係咪有點面善呢？之唔係電視onlinegame廣告裏扮惹火蜘蛛精嗰位囉。「又食？師大夜市個個都識啦！」但你又知唔知師大都係個shopping好地方？「我就住這裏附近，有幾家店是我常去的，等我來帶路吧！」
記者、攝影：曾冠輝
PROFILE
楊伊湄
綽號：國企湄
年齡：21
身高：163cm
三圍：34F、26、35
現職：模特兒、活動主持
女裝部：台風blingbling袋
咪睇伊湄扮蜘蛛精或做showgirl咁惹火，F級身材背後竟然自認鄉下妹：「我是高雄人，是個鄉下妹，沒有台北女生一般開放！」平日嘅佢唔玩唔蒲甚至唔出街，自己都話自己係「宅女」，但跟她走一轉師大夜市，行情卻熟到不得了。
師大路窄，行落其實有啲似利時與加連威老道之間一段小路，小舖多。不過有啲舖，如果淨係我去行的話，是淘不出寶來的，至少呢間門口掛滿blingbling珠片手挽袋的，我會過門而不入，好在伊湄一句：「台北今年流行這種亮片包唷，我已經買了好幾個！」袋面上的「Kitson」原來正是荷李活明星至愛的L.A.品牌，亦曾有店舖引入香港。此店是台灣獨家代理Kitson，店內袋款極多，同款亦有超過4、5種顏色選擇，標價$400再打六折，計番兩嚿零，仲平過網上shopKitson度買。「喂喂，你說我買藍色還是金色好？既然這麼便宜，不如兩個都買了吧……」我怕她會失控忘掉工作，都係行入兩步轉移視線穩陣。袋以外店內還有服裝，款式走少女路線（咁梗係啦，喺大學附近喎），價錢亦相當便宜：「伊湄，麻煩你可以試穿幾套衫讓我拍嗎？」終於暫時可以壓抑一下少女嘅物慾。
aKikiShop
地址：大安區雲和街51號
頭飾部：香蕉夾10秒變髮
越夜，師大附近人越多，擠滿課後的少男少女，還有下班趕集、覓食的上班族，也多了湊熱鬧的遊客，請容我呻一句：喺師大拍片兼採訪真係好難。跟着伊湄行行吓，她停在一家頭飾店前，把玩着手上的七彩棉花糖波波：「可以吃的嗎？」「哈哈，紮頭的橡皮圈呀，儍瓜！」我男人老狗兼skinhead，邊知道坊間頭飾鬼五馬六，原來呢種「棉花糖」已興咗一輪，最潮是另一款有十幾種玩法的髮夾：「這種香蕉夾的用法多，很方便很容易，只要一夾，扭一扭……」剛好伊湄有一把長髮，店員即席在她頭上示範，兩三下手勢經已紮出最啱夏天的清爽型髮髻，手法快得看不清，更加唔好話用文字講你知佢嘅使用方法。你試吓click去睇短片睇吓偷唔偷到師？偷唔到就請親自到訪拜師學藝紮頭髮。
bPinkFashion
地址：大安區龍泉街39號
男裝部：台潮飛鼠褲
自言少出街的伊湄，有時會陪弟弟逛逛街，「這家就是上星期跟他來過，覺得不錯的！」來到師大已是下晝6點，Ambition老闆才剛開閘做生意：「哈哈，師大這邊開店是比較晚，晚上比較熱鬧嘛，我算早了，隔壁還未開咧！」舖頭所賣是型格男裝衫，調子偏向黑白灰。老闆仲凱是個潮男，定期會到韓國入貨：「如何選貨？選一些我自己喜歡，我會穿出街的就是了，賣不出去我都可以穿嘛，哈哈……」潮流我唔熟，不過店裏都有日本早已興起的男裝leggings：「台北男生近來也興起穿短褲加leggings了，而我自己比較喜歡這種褲襠低而窄腳的飛鼠褲，穿起來視覺上比較修長。」仲凱也間中做model，親自為店內服裝示範，將照片都放到網頁，果然係賣唔出，自己都着得番！
cAmbition
地址：大安區雲和街49-1號
ShidaMarket
溫馨提示：師大夜市對開有個小公園，晚上有不少年輕人聚集食消夜，間中有人彈結他賣藝，氣氛唔錯的！
TravelMemo
持BNO或特區護照可辦理網上或落地簽證。中華旅行社：25258316
香港來回台北機票價錢$1,180起，中華航空： http://www.china-airlines.com/hk
1港元約兌4.1新台幣（文中價錢已折算港元）
110V，兩扁腳插座
台灣 台北
下周多雲22-29℃
