立法會財經事務委員會噚日開會擦出火花，主角之一係不苟言笑嘅財爺鬍鬚曾。事緣議員湯家驊發問時批評財爺答案重複，好似人肉錄音機，被人與林公公相提並論。財爺即時扯火，還拖話議員每次嘅問題都係一樣，所以答案咪一樣囉。之後刀光劍影，大家鬥大聲各有各講。
唔單止湯大狀，噚日財爺連卿姐都窒。卿姐指香港有成19萬住戶月收入低於4,000蚊，質問官員如何解決貧富懸殊，點知財爺即刻回敬佢，話卿姐遲到，呢條問題已經答咗好多次（事實只係第三次），跟住再重複答案：由於本港家庭人口減少以及老齡化，當中12萬戶屬於無入息長者，真正低收入家庭僅2.83萬戶，較去年下跌13%。總之，貧富懸殊唔係數字上咁嚴重啦。