周秀娜（Chrissie）噚日帶住7個新o靚模小師妹包括Jeana、Betrys、Vibeke、Mia、Suki、Rika同Hidy，加埋組合Bro5成員，一齊現身銅鑼灣出席《Yahoo!激射龍門街頭大比拼》活動，Chrissie同師妹着住性感運動衫，同現場觀眾玩鬥射龍門遊戲，Chrissie第一腳省中Jeana塊面，好彩係吹氣波，咁Jeana食波餅都唔會痛又唔怕破相。
安慰中招師妹
不過Chrissie都好識做走埋去呵番師妹。輪到Mia射波時就竟連隻波鞋都飛甩埋，相當搞笑，成班女仔論論盡盡，雞手鴨腳，不過最肉酸都係Hidy，唔知係咪件面衫太緊，入面件打底衫又唔夠貼，搞到啲衫摺埋一箸。
烈日當空下，Chrissie曬到死死吓，流咗一身汗，不過識撈嘅佢就猛話近排少見太陽，流汗當做運動，不過喺鬧市街頭，Chrissie點都有啲擔心，就係怕有鏹水彈，至於請Jeana食波餅嘅Chrissie講笑話：「我唔係有心，但見佢咁得閒咪請佢食波餅！」至於Jeana就話自己咁都中真係要買六合彩，可能會中頭獎都唔定。而甩鞋嘅Mia解釋自己對波鞋因斷碼逼住買大一號，估唔到鬆鬆哋一腳就飛甩咗。