花旗股市上禮拜五急挫，道指跌穿10000點，跌幅超過300點，成交大增，打破之前反彈向好嘅走勢，突然轉變係因為匈牙利又話唔掂，有機翻版希臘，投資者爭相沽貨，花旗股市勁跌肯定拖低港股。港股近日走勢已經好轉，掉頭再跌，19000點守唔守得住再受關注，明日拍地成績亦會影響後市。
光控C輪22928：中國光大控股（165）上日報收17.56元，升2.45%，股價早排喺低位以大陽燭回升，造旗之後上日突破20日線，有機上破19.5元，推向21元，可以諗吓隻C輪22928，隻輪現價24.9仙，2010年12月2日到期，行使價18.58元，溢價19.99%，引伸波幅60.42%，有效槓桿3.69倍，正股見21元，22928睇45.4仙，可升8成，正股跌穿16.5元就沽咗隻輪。
俊樺