公民黨黨魁余若薇就快要同「起錨曾」就政改問題進行歷史性電視辯論，余大狀為收集市民對政改意見，噚日專登走去深水埗，探訪住喺只有幾十呎面積板間房嘅居民，聽吓基層對政改意見。佢唔似得啲煲呔高官咁，喺大批警察、便衣同新聞官護航咁大陣仗，淨係揀商場做騷。
余大狀同八方講，雖然板間房地方細，出出入入都唔係咁方便，但一啲都唔覺得辛苦，因為落區係要聽市民意見，佢噚日單拖落區，費事人太多搞到聽唔到市民聲音。
探訪期間，一位女街坊同余大狀訴苦，話北河街街市附近啲熟食檔俾食環署針對，好多都執咗，搞到街坊冇啖好食。就算唔屬於政改問題，余大狀都好認真聽晒，話會同有關部門反映。