歐洲啲國家近排輪流出事，主業喺正當地嘅ESPRIT思捷環球（330），當然冇得倖免，仲要屋漏兼逢連夜雨，最近思捷又有高層被人挖走嘞！
回顧番舊年，思捷嘅高層其實已經好似走馬燈咁樣，不斷有人走。喂，你估股東驚唔驚呀？都唔知係人事唔夾所以搞到最終各行各路，定係公司出手太低留唔住人才，講真，股東最怕都係啲管理層管唔掂間公司唧。
好似一直被外界認定為思捷CEO接班人嘅前執行董事戈達（ThomasGrote），舊年3月辭職、之後跳槽咗去另一行家──MEXX嗰度，估唔到戈達原來一早已經向啲舊同事埋手，仲俾佢成功喺舊公司挖走咗兩個資深嘅高層轉投MEXX旗下。眼見啲高層一個接一個咁走，思捷要請番人嚟補位，睇怕有排煩。
銷售主管品牌總監齊跳槽
根據麥格理發表嘅研究報告講，跳槽咗去MEXX嘅兩位思捷高層，分別係銷售關係部門主管兼高級副總裁VolkerSchmidt，同埋全球品牌總監JimNowak。佢哋兩個分別喺思捷做咗成16年及9年咁耐，算係老臣子啦！
Schmidt加入咗MEXX之後，會主管環球批發部門，同埋負責喺德國、奧地利同瑞士等地區嘅業務發展；而Nowak就負責管理全球產品開發及設計。
麥格理話，思捷損失呢啲高級管理人員，會增加公司未來嘅營運風險，而且唔排除MEXX會繼續喺思捷撬走人才。
唉……華華諗番起早幾年嘅思捷，不知幾風光，不過，自從前主席邢李㷧離開公司之後，高層就不斷變動，生意亦都俾金融海嘯蹂躪得今非昔比。早排邢生沽清思捷股份，唔通真係冇眼睇？
李華華
mailto:[email protected]