問責班子掟咗好多錢推銷政改爛方案，點知都係於事無補，第二次落區都照樣被狙擊，一眾高官好似過街老鼠，狼狽閃避示威者。除咗煲呔、唐唐、鬍鬚曾等巨頭外，其他問責官員都唔好過。
阿Sir插水扮跌落地
好似孫公同D姐俞宗怡咁，佢哋喺太古康怡俾社民連陶君行同季詩傑狙擊，諗住快快上車起錨走人。點知阿陶眼明手快，貼咗五張「超錯」貼紙喺車頭，重貼埋「取消功能組別，落實雙普選」標語。高官上車後急急開車，坐住「超錯號」出發。
抗議期間有CID同示威者有衝突，阿Sir重插水扮跌落地，演技浮誇過煲呔。
107動力都做咗個「浪費」標語，走去坑口站狙擊鬍鬚曾同傻強陳家強，要求佢哋交代政改宣傳究竟嘥咗納稅人幾多血汗錢。不過你估佢哋會唔會得到答案？市民創意無限，依足「起錨」宣傳品字形改圖，有示威者高舉紅藍底字「毛恥」標語向高官示威，批評高官落區做騷、但無意落實真普選，相當無恥。