阿里巴巴（1688）老闆馬雲竟然被人斷斤賣？唔係呀？故事係咁嘅……華華早前去到內地嘅四、五線城市河南新鄉市，行咗去當地最熱鬧嘅步行街，有間街邊書報攤，擺咗唔少教人做生意同投資嘅書，吓吓，竟然見到馬雲嘔心瀝血編寫嘅生意心得《馬雲全集──阿里巴巴教父的激盪創業史與財富人生》，成吋咁厚，標價係88蚊人仔。
華華將本書遞畀老闆娘話要買，諗住一嚿水有找，點知佢竟然將本書擺喺個磅上面，磅到斤幾重，然後就開價十三個八。嘩？咁都得？馬雲嘅心血結晶，原來只係好似豬肉咁，俾人斷斤賣。
成條步行街得嗰兩檔書攤，但運動服裝用品舖呢，有佔成四成咁多，唔少仲係上市公司嘅舖頭。競爭咁激烈，結果係點？咪大家都拍緊烏蠅囉！原來呢個係北京奧運一窩蜂嘅後遺症，到家都未消除晒。唔單止新鄉，華華去過其他三、四線城市嘅步行街，都有同一個現象，睇嚟運動服裝行業仲需要一段時間整固噃！