富豪產業信託（1881）現價嘅息率回報挨近10厘，係時候睇位翻兜。富豪產託09年度每單位派息0.17元（08年度0.167元），現價1.71元，息率9.9厘。要咁睇，09年上半年，香港酒店業界仲受到H1N1流感及金融海嘯影響，但富豪產託分派有增無減。到咗今年，呢啲負面影響因素無晒，經濟一路好轉，加埋富豪產託又新增灣仔酒店物業，照計今年可分派嘅收入總額唔會少。真係好保守計，富豪產託今年每單位派息係咁易多增10%，到0.187元，息率回報挨近11厘。
呢轉睇位，富豪產託再跌，吼實250日線1.57元撈底，到時，佢嘅息率進一步提高到近12厘，超高息，防風力特強。博上番1年高位1.97元，潛在回報率25.5%，目標價息率仍然高達9.5厘。
中軟低吸博升2成
中國軟件國際（354）係上個月頭，獲國際金融公司（IFC）兌換3000萬股優先股做普通股，IFC份屬世界銀行組織成員，中軟有超級大孖沙嘅股東背景。中軟到上年底止，手頭現金有3.5億元，借款都係得1.2億元，淨現金超過2億元。中軟係現金牛，又有一定防風力。呢轉實橫行底1.35元入市，博中軟升20%到1.62元，短打有魚有肉。
錢雋