小妹一放假就揹個背囊自助旅遊，仲鍾意買啲古靈精怪嘅手信收藏。國際漫遊協會幹事James同小妹報料，國際旅遊展周四起一連四天喺灣仔會展舉行，協會趁機同場舉辦首個旅遊珍藏展，將會員喺全世界40幾個國家搜集得嚟嘅奇珍異寶，一次過晒冷展出，包括復活島火山石像、津巴布韋100兆紙幣、亞馬遜河食人魚匕首等等。
即場投票選珍品
James好自豪咁話，佢都有貢獻，包括展出喺緬甸買到用瓜子造嘅手袋，同埋1989年喺柏林圍牆親手鑿嘅兩嚿石頭。但係佢話全場最有趣嘅展品，係埃塞俄比亞大餅族人口入邊嘅陶製大碟，「埃塞俄比亞南部嘅Mursi族成年女人，會將嘴唇開，套上一個陶製大碟，咁樣先叫做靚喎。」
James仲話，公眾唔單止可以欣賞呢啲古靈精怪珍品，仲可以免費參加即場投票，選出最喜愛的珍品，「最具慧眼獎」嘅得主可獲得由太古旅遊送出嘅雙人三亞3日2夜酒店住宿連來回機票套餐，總值4,780元。真係有得睇又有得玩，詳情可以瀏覽協會嘅網頁（ http://www.itahk.net）。
電郵：mailto:[email protected]