在港鐵站見到某電影海報，有一隻高跟鞋踩爆足球，其實女人跟世界盃並不是永遠只能對立，作為一個好女友、好太太，世界盃期間除了呷醋撒野之外，不妨炮製健康愛心小食，好似Catherine仲用睇波良伴啤酒及提子乾加入做熱香餅，出來效果好鬆化，女人加上足球，呢個化學作用大到連「Kingsley」林峯都解釋唔到！
記者︰黃家欣
攝影︰楊錦文
場地提供︰SixSenses（28389905）
Catherine（國泰航空飲食服務中心廚師）
現年23歲，已有五年包餅工作經驗，擁有多個專業牌照，亦熱愛烹飪，曾參加過不少大型菜式設計比賽。
提子乾熱香餅
00hr20min
製作難度：★★☆☆☆
份量：4人
熱香餅香甜鬆化，入口除了有蛋香，還有陣陣啤酒麥芽香，而且仲有粒粒提子乾好有咬口，就算不加蜜糖及糖漿，已經好夠味，一邊睇波一邊搣來食夠方便！
材料
雞蛋4隻、砂糖175克、低筋麪粉320克、水100克、啤酒80克、泡打粉15克、溶牛油27克、加州提子乾50克
做法
1.將雞蛋拂勻，加砂糖、水及啤酒拌勻。
2.然後篩入低筋麪粉及泡打粉拌勻。
3.再加溶牛油拌勻成為麪糊。
4.燒熱鑊下少許油，加入一勺麪糊，灑上提子乾，用慢火煎至冒泡，反轉煎至兩面金黃色即成。
花生脆脆
00hr30min
製作難度：★★☆☆☆
份量：4人
平時睇波總要有一盤花生邊咬邊睇才過癮，齋食花生未免單調一點，不妨加入提子乾及糖漿，做成香脆又甜蜜的花生脆，食落有多重口感，加入提子更加無咁滯。
材料
加州提子乾70克、花生100克、砂糖130克、水30克
做法
1.先將花生放入保鮮袋，然後用擀麪杖略為敲碎。
2.將水加入鑊煮滾，加入砂糖用大火煮成金黃色後熄火。
3.放入花生碎、提子乾拌勻，平放於枱面攤凉即完成。
麪包布丁
01hr00min
製作難度：★★★☆☆
份量：4人
麪包先烘到金黃香脆，再浸牛奶蛋漿，食時口感仍然鬆化，下半部份則香甜軟熟，蛋香十足，加入粒粒提子，更有果香，睇波時拿着一杯杯慢慢食，真係最佳消夜！
材料
麪包3片、鮮奶250毫升、砂糖40克、雞蛋4隻、加州提子乾30克、牛油50克
做法
1.將麪包切成小正方形，塗上牛油，將麪包放入已預熱至180℃焗爐，焗至兩面金黃。
2.將雞蛋、糖、鮮奶及提子乾拌勻成為蛋漿。
3.取出焗好的麪包，放入焗盤，淋入蛋漿至九成滿。
4.放入已預熱至180℃焗爐，隔水焗45分鐘即成。
脆脆芭菲
00hr15min
製作難度：★☆☆☆☆☆
份量：2人
世界盃要捱夜睇波，當然要補充一下營養，這個加入乳酪及提子的脆脆杯，香滑濃厚又帶淡淡酸味，食完好醒神。
材料
純味乳酪100克、早餐穀物脆片80克、加州提子乾20克
做法
1.將早餐穀物脆片倒入杯中，加入純味乳酪，再鋪入少許穀物脆片。
2.最後加提子乾即成。
燕麥曲奇
00hr30min
製作難度：★★★☆☆
份量：2人
曲奇餅可減少糖份，食時就更清淡健康，灑上提子乾令味道多一份香甜，另外還有一粒粒焗得脆卜卜的燕麥，食時口感香脆，有食薯片的口感，但就無咁熱氣！
材料
牛油450克（放軟）、砂糖225克、雞蛋3隻、高筋麪粉340克、低筋麪粉235克、燕麥50克、加州提子乾200克
做法
1.牛油加砂糖拌勻。
2.將高筋麪粉及低筋麪粉倒在枱面，中間挖一個洞，打入雞蛋，放（1）用手搓勻成粉糰。
3.然後加入燕麥及提子乾搓勻。
4.將麪糰搓勻後，用擀麪杖壓平，用圓形模印出圓形，放上焗盤。
5.放入已預熱至150℃焗爐，焗12分鐘即成。
