5月20號〈架勢〉出街，餘韻不絕。有認識及老闆娘多年的食界朋友來電來郵問訊：去大良約埋我哋啊嘛一定吃到好嘢。……同老闆娘不知幾熟點會吃唔到最菜式飲唔到湯？……下次一齊去邊度邊度還你一次公道……！
慰問、擺平、安撫、笑餐死；各式反應。都鄭重感激有心朋友，他們都是食界明星天神仙班，為香港以至大中華區吃食推廣衞冕多年，只要大家吃得好，食市亨通社會暢旺，多年好好醜醜盡數包容隱惡揚善，為中國吃食大國之名打通經脈。
不少讀者話：阿邊個邊個介紹親都難吃，唔知盛名何來？一啖砂糖一啖屎擔戴得來。當然也有朋友complain呻到樹葉落晒；你介紹嗰間乜乜乜，把鬼冇啖好吃連坐都衰格，更不要說侍應晚娘面口！
慘，終於燒到自己嗰叠。
流浮山歡樂，週二晚人客比較輕鬆寬落，一面吃B仔款客拿出有錢買唔到近兩斤重本地野生方利肉彈質膠，連平素不太吃魚的葉童也一再舉筷。全店只有兩條，肉聯及興隆負責人伍智聰網球比賽晚到，只好再來一尾滿足為食鬼眾人。
這場面便是朋友牌，如非遇上熟人，一些珍貴食材如何出爐？如非老闆特別關照忙至一頭煙的大廚如何騰空出手？行內人B仔，NewYorkCafe林生與伍生Eric談起都笑着罵我怪錯好店。是的；一、二百人客同時共食，走單、漏單、招呼失準着實難控制。今時好員工難請，如若餸菜未得100分也因笑臉招呼挽救慘況，遇上趕客員工，幾乎一生一世再沒下一次回頭。期望好酒家好朋友對食神或瘟神如我及廣大群眾都能平衡擔戴，雖然明白大廚只得一雙手。