誰會珍惜當你還擁有？每年燭光集會都會擺在維園嘅民主女神像，今年慘遭港府針對，被扣押差館幾日，大家先至發現好多以為理所當然嘅嘢，即係好似表達自由咁，原來一夕間可以冇咗，兩個民主女神像過去幾日同時喺維園放，好多市民噚日去到維園，第一時間同「民女」合照。
紀念品海鮮價
支聯會一直有製作約10吋高民主女神像擺設，呢尊小型「民女」以白磁製造，每年支聯會年宵、六四集會、遊行都有售賣或捐錢獲贈，銷情近年冇乜突出，經強搶「民女」事件，呢尊小神像頓成熱門貨，噚晚好多人一見到就即時畀錢，每尊盛惠100蚊。
支聯會人員話一時間難以統計去貨數字，總之存貨可滿足需求，八方印象中「民女」擺設往年價錢冇咁貴，工作人員笑言呢啲紀念品係海鮮價，總之大家講心，幾多錢唔係大問題，八方係精明消費者，發現網上訂購每尊40蚊咋。