我夠知學華Dee揸烈火戰車，肯定會型到爆燈，不過孖轆揸法同四個轆完全兩回事，學不得其法會相當危險。偏偏Kary吳雨霏信心十足，考電單車牌就係為咗跑車級Ducati烈火戰車。咁大膽？原來得鍾Sir親授口訣：「Brake不太緊！」
記者：徐影龍
攝影：陳陶鈞
鳴謝：香港駕駛學院
煞車充滿學問
揸電單車同私家車當然有別，要學嘅嘢同樣多如繁星，不過經香港駕駛學院鍾Sir講解後，突然又唔覺孖轆難學，嗰種逍遙自在感，連我幾廿歲人都忽然雄心萬丈想扮劉華，難怪Kary又要驚又要學喇。
千祈咪將踩單車嗰套用落電單車度，事關煞車力度可以引伸好大影響，聽鍾Sir講控制Brake嘅Timing同力度，都比四個轆更嚴謹，而且仲分頭Brake同尾Brake嘅交替用法，「通常都係前後Brake一齊用，斜路打8字先會齋用尾Brake，又或玩雜技先齋用頭Brake。好多人揸私家車鍾意LateBrake，但電單車好易會擺尾，絕對唔啱急煞。以50km/h慢車計，應該前後Brake一齊慢慢收緊，控制好速度先入彎，切忌彎中拖Brake，若入彎時發覺速度仲係好快，大可『企』直番架車再收Brake，唔好Keep住側身入彎又踩Brake，否則好易『派牌』。咪以為綿羊仔慢揸就無事，家陣天氣潮濕又落雨，失驚無神急煞，跣胎、擺尾風險將大大增加。」
夢想買孖轆法拉利
Kary同好多美少女一樣，又係細細個睇戲見人揸車好型，就立志大個咗要考齊私家車同電單車牌：「我好鍾意車o架！所以一夠18歲即刻考牌，私家車牌已經有喇，家就努力考埋電單車牌。起初都幾驚o架，個引擎咁近身，又震又嘈，心入面都好戰戰兢兢，更試過斜路打8字「掃低咗」。不過學咗10堂之後，已經揸得好暢順，而且好Enjoy電單車嘅刺激感㖭。」
「考到牌之後，好大機會買Clubman，我鍾意纖纖瘦瘦嘅車身，而終極夢想，梗係電單車界法拉利嘅Ducati啦，就算唔揸，有得坐吓已經好開心。」
揀車對腳要掂地
要學好電單車，當然唔係齋識用Brake就得，鍾Sir繼續滔滔不絕：「首先最好有私家訓練場地同斜坡，對磨練高難度技巧好有幫助。有機會上快速公路，要留意盡量避開『打困龍』，即前後左右都近距離有車。同前車保持嘅距離都要注意，遇着密斗之類嘅大車，你起碼要望到佢兩邊側鏡先算安全距離。另外離開快速公路準備分流時，好多人對速度都會麻木，收慢速度時要多啲望咪錶，千祈唔好靠估。」
香港地越嚟越多女仔揸兩個轆，鍾Sir有乜好建議？「其實女仔都好啱揸電單車，揀車反而要留意，如車身唔好太高，收起大架同側架後，雙腳都要掂到地，車身唔好重過自己三倍，假設你100磅多啲，最多揸架400cc車，否則倒後、斜路泊車會好論盡。」
