賽前揚言要報卻兩年前總決賽輸波恥辱的湖人，憑主力拜恩及加素「身體力行」，合力攻入53分，助湖人於周四首戰以102:89擊敗塞爾特人，在今屆總決賽先拔頭籌。
湖人上屆雖然擊敗魔術奪得總冠軍，但08年總決賽不敵塞爾特人，尤其第6戰大敗39分，是湖人主力拜恩及加素兩年來的鬱結，今仗，兩人盡情發洩。
拜恩加素盡情發洩
拜恩在首節已獨取8分，為球隊建立26:21的領先優勢，他更負責緊盯對方控衞朗度，令客軍第1節就錄得5次失誤。至於08年被批評「軟蛋」、兼被加尼特「食住」的加素，今仗亦發揮強悍本色，取得球隊第2高的23分及摘下14個籃板，其中8個進攻籃板更等於綠軍全隊總和；這位西班牙長人全場作出3次封阻，令綠軍在內線「冇啖好食」。
教練積遜賽後大讚加素：「如果加尼特是塞爾特人的內線進攻重心，加素就是我們的主角；我期待兩人的較量，也為加素勇於面對加尼特的粗暴防守感高興。」反觀加尼特今仗未在狀態，全場僅拉下4個籃板，在第4節末段更於籃下射失，令綠軍無力反先。
經驗及抗壓能力豐富的塞爾特人，也並非全場捱打，阿倫及皮雅斯背負5犯，但在第4節一度打出8:0的攻勢，追至74:85；但湖人經過暫停調整，由法瑪及加素建功，又將比分拉開至雙位數，最後以13分大勝。
塞爾特人教練李華士說：「對手的硬淨程度比我預期更強，我們的調節比較慢。」綠軍也因未能鞏固內線防守致敗，湖人全場共拉下12個進攻籃板，第2次得分多達16分，相反綠軍卻只得0分。
朗度拒以傷勢作藉口
綠軍前鋒皮雅斯賽後失望地說：「湖人是一支擅於搶籃板的隊伍，我們今天卻沒有好好保護籃底，也失掉過百分；防守是比賽勝出的主因，特別是總決賽之戰。」此外，傷兵問題對綠軍亦影響甚大，朗度、華萊士等都帶傷比賽；身負背傷的朗度說：「我不會用受傷做藉口，兩天後我就回復最佳狀態；來到總決賽，那一位球員會沒有受傷？」總決賽第2戰在下周日（香港時間周一8:00am）進行，續由湖人主場對塞爾特人。
綜合美國外電
花絮：奧斯卡影后撐湖人
湖人主場史達普斯中心一向星光熠熠，去到總決賽更誇張，積尼高遜、史提芬史匹堡同里安納度狄卡比奧等常客當然喺度，影星德斯汀荷夫曼、大衞杜楚尼、史泰龍同阿當桑迪拿亦在場；就連奧斯卡影后查理絲泰朗同希拉莉史雲克都有到，後者仲好識做，高舉支持湖人嘅tee（圖）畀記者影相，夠晒搶鏡。
花絮：阿達斯豪請fans睇波
總決賽一票難求，場邊好位直頭係有錢都買唔到。湖人球星阿達斯（圖）有見及此，今仗就自己使咗18,000蚊美金（約14萬港元），送咗兩張飛畀佢嘅忠實球迷；阿達斯接受電台訪問時就話，想同球迷分享自己首次打總決賽嘅感受，更希望佢哋得到巨星級待遇。阿達斯對fans咁細心，真係估佢唔到。
花絮：積遜贏開就贏夠巴閉
拜恩今仗成為贏波英雄，幫湖人旗開得勝，根據紀錄，湖人教練積遜（圖）喺季後賽系列戰中，只要贏到第1場，歷來47次都順利贏埋該系列賽，咁湖人咪即係捧硬盃？而今場亦係積遜同拜恩拍住上嘅季後賽第111場勝仗，超越之前積遜同柏賓所創嘅110場史上最多紀錄，都咪話唔巴閉。
花絮：桂神告別ESPN
拜恩嘅表現真係神奇、頂級、超卓！相信一眾「桂神」fans，都對黃興桂（圖）嘅金句耳熟能詳。呢位足、籃皆精嘅「神級」評述，噚日拍住另一位Peter（張丕德）講湖人對塞爾特人場波；趁尾段進入「垃圾時間」，「桂神」就自爆由72年已睇住湖人捧盃，支持佢哋近30年。雖然「桂神」將告別ESPN，但fans唔使擔心，事關佢稍後會長駐香港，除咗教o靚仔波仲會幫收費台講世盃，到時球迷肯定知道咩叫燒鵝嘅味道！
