六四事件21周年，老一輩人未敢忘記，但係好多90後就唔太認識，只好透過網絡了解血染一頁。八方今次有好介紹，當年由64名曾經採訪北京民運的香港記者撰寫，可以話係入門手冊嘅新聞紀事書籍《人民不會忘記》（圖），近日已經全書上載記協網頁（http:\\www.hkja.org.hk/1989report），畀市民免費閱讀。
編輯委員會話，辛辛苦苦將成40萬字整理上網，就係要畀更多人認清六四嘅真相，而新一代慣咗上網search嘢，呢本書就可以提供佢哋出世前六四事件第一手全面報道、紀錄同分析，希望佢哋永遠唔會忘記89年嘅中國民運歷史。講開《人民不會忘記》，上年記協重新再印咗18,000本紀念20周年，家只係剩番好小量，之後唔知幾時會再印，絕對有買趁手。