【本報訊】21年前，坦克車輾過身軀，要令民運消音；今天的香港，政府兩度強搶民主女神，意圖把支聯會趕絕，一次又一次的行動最後變了「另類」動員，不少巿民不忿政府為虎作倀，紛紛湧到維園，表明未敢忘記血債，有巿民直言，「唔好以為我哋平時唔出聲就冇所謂，香港人好緊張呢啲嘢。」
記者：張嘉雯、梁德倫
今年50歲的邱先生，過去20年都沒有參加六四集會，今年終於第一次參與，「當年啲人企喺坦克車前嘅畫面我仲好深刻印象，再唔嚟唔知仲有冇機會嚟，睇到近日嘅新聞好過份，收窄得好緊要，連呢啲集會自由都唔畀香港人，好明顯係受到中央影響，唔好以為我哋平時唔出聲就冇所謂，香港人好緊張呢啲嘢。」
不斷打壓 文員首次站出來
同樣第一次參加燭光集會的黃小姐亦指，當年學生只是為國家着想，沒有做錯，沒想到21年後的今天香港政府一而再沒收女神像，「呢兩年成日聽到話唔畀維權人士入境，過多幾年唔知呢啲集會仲嚟唔嚟到，所以都係嚟一嚟。」
任職銀行文員的謝小姐表示，1989年時她讀小一，原本不太清楚六四詳情，但近日政府不斷打壓六四紀念活動，反而令她更有動力首次站出來，看到其他人都踴躍出來，令她很感動。
首次參加六四集會的中五會考生譚欣然表示，學校老師有向她們講解六四事件，也鼓勵她們參加紀念活動。以往六四都碰上考試，今年剛好考完會考，加上近日不斷發生打壓紀念六四的事，令她更想參加。第一次出席燭光集會，她感到集會和平理性。她的同學伍君怡也表示，政府不應打壓和平集會，她以往只是從網上了解六四事件，今年首次親身參與體驗，覺得很震撼。
沒收女神「起碼多兩三萬人」
年年都參加六四集會的香港社工總會總幹事黃強生指出，「政府打壓，以為可以令我哋會驚會收斂，真係錯晒，我同好多後生仔傾過，佢哋都大鬧政府豈有此理，令今年氣氛更加熾熱。」
同樣任職社工的鍾先生，見政府近日打壓嚴重，「擔心維園冇位坐」，所以昨晚特別提早到場，「可能有啲人以為呢件事淡咗喇，可以做多啲事去打壓呀咁，但係去到某啲關口位，我哋掉番轉會行返出嚟，畀有關人士知道其實唔係咁」。
丁先生昨晚帶同7歲的女兒出席維園集會，目的是與當局的洗腦教育抗衡，「因為政府曲就變直、黑就變白，我唔知佢第時會唔會經過教育局、經過學校將佢哋嗰套講畀小朋友知，洗佢腦，所以我要快一步帶佢嚟。」他認為沒收女神像明顯是政府打壓，「佢咁做太過愚蠢，你做沒收呢件事之前有冇諗到後果呢？好明顯係冇，佢今次咁做，起碼call多兩、三萬人出嚟啦。」
拒放女神 「中大令我好失望」
大學生麥小姐認為政府打壓紀念活動，背後有政治目的，「我絕對相信咁負面嘅新聞，會令更多人參與六四集會」。對於中大不接受擺放民主女神，她認為不能接受，「作為一間大學，講政治中立，但係接受唔到任何意見，佢哋嘅角色應該係培育學生接受唔同意見，而唔係家咁，一間學校機構竟然咁，令我好失望。」
專程來港參加六四集會的台灣學生焦先生表示，想來香港見識一下中國境內唯一可以自由紀念六四的地方，他認為無論政府是否打壓，港人都要站出來，為不平發聲。
來維園......
