【本報訊】想到六四，自然想到支聯會主席司徒華。帶領支聯會走過21年崎嶇路的華叔年初發現患上肺癌，帶病在身的他堅持不缺席任何六四悼念活動，這一份堅持感動了不少市民，昨天的六四燭光集會便有不少市民為華叔而來，冀用行動向華叔證明港人平反六四心火不滅，也答謝他多年來為六四事件付出的無限貢獻。
記者：許偉賢 林俊謙
與華叔同樣是「七十歲後」羅先生較華叔小四歲，75歲鬢髮斑白的他昨天山長水遠由馬鞍山趕到銅鑼灣，為平反六四，也為帶病在身的華叔打打氣：「華叔我最擁護佢o架喇，佢幾十歲人又有病，佢叫中國畀個（回鄉）證佢去探劉曉波，佢講得好啱。」羅先生大讚華叔一直堅持平反六四，完全是因為希望中國發展更好，他說「我同佢都一樣，係希望中國更好，點能夠仲一黨專政？如果係咁又點樣要求統一台灣？」
不怕打壓 勇敢抗爭
年事已高的羅先生希望，「華叔同我一樣可以見到六四平反」。貼上「超錯」貼紙的羅先生不忘「教訓」特首曾蔭權，「政府打壓點可以咁犀利？佢個政改方案都係全部委任嚟o架啫。」
本身為生意人的陳女士向來都將支持平反六四的心願放在心，今年卻首次付諸行動，原因之一無非是要支持抗癌中的華叔，「佢老人家咁多年嚟都一直咁堅持，我都好佩服佢；尤其佢咁病重都肯企出嚟，我哋就更加唔可以唔企出嚟。」
她支持平反六四，「因為當年嘅學生係好大公無私」，呼籲所有想中國進步的人也要勇敢的站出來，「我哋一定唔可以驚、唔可以畏縮，咁樣我哋先至會有希望，否則只會俾人騎住嚟打。」陳女士也炮轟政府政治打壓，「我覺得政府好無恥咁打壓個六四運動，佢係要向上面交心，咁樣真係好錯好錯。」
「華叔由89年已經開始搞活動，就算患癌都肯出嚟，我覺得佢貢獻好大，今次出嚟都係有啲因為要支持佢。」20歲就讀新聞系的伍小姐昨天首度參與燭光集會，大讚華叔為特區民主貢獻良多。她指經過多年了解，對六四事件有足夠認知，「覺得年紀都有咁多，又係大學生，應該（是時候）出嚟（參與）紀念。」
作為中國境內罕有可以公開悼念六四的地方，伍小姐希望香港的燭光集會永遠延續下去，直至六四獲得平反，強調「如果呢個（自由悼念）精神都冇咗，就太過可惜。」
堅守立場 值得尊敬
昨天在維園內的政圈中人也為華叔打氣，資深傳媒人程翔稱：「由於華叔21年嚟嘅堅持，六四悼念活動先至成為香港人生活嘅一部份」。公民黨梁家傑也不諱言，「諗起華叔，就會諗起平反六四」，指華叔對六四的貢獻無人可及；公民起動何秀蘭指華叔多年來都為平反六四而努力，「喺強權面前堅守立場，好值得人尊敬。」華叔回應不少支持者為他而來時表示，「我相信佢哋唔係支持某一個人，而係支持我呢個信念，『毋忘六四、平反六四』，大家都有呢個信念。」