政壇上，沒有永遠的朋友，也沒有永遠的敵人。一場公投，泛民內部因路線之爭元氣大傷，之後的「余曾辯」及中聯辦「忽然開放」，皆被視為分化泛民的手段。民主黨、公民黨及社民連是否從此分道揚鑣？三黨領導的答案是：「不！」
激烈與對話都係民主派
「我哋點樣唔同都好，民主派之間嘅分歧只係一條坑渠，同保皇黨、特區政府、以至共產黨之間嘅冇得比，我哋之間隔咗成個大海。」民主黨主席何俊仁認為，泛民在爭普選的目標上，只是策略上有分歧，不是分裂，「我哋大家都係弱勢，成個泛民加埋都係弱勢，全靠群眾同埋輿論而得到支持同保護，要互相支持。」
何俊仁認為，泛民內部唇亡齒寒，各組織有互補關係，如何修補裂縫，視乎大家的胸襟，「即使公投嘅人幾憎家個談判都好，或者談判啲人覺得公投幾激進，家另外嗰邊嘅人就係覺得我哋喺度扯貓尾，一個白臉，一個黑臉，向佢哋施壓，人哋咁睇，但係我哋入邊啲人竟然咁小器。」
推動公投期間，分別支持談判和公投路線的陣營，都曾經質疑對方的策略，「每邊都總會有啲人比較情緒化，講咗啲意氣說話，可能傷害咗第二啲人。我哋出嚟咁耐，喺個運動上折騰，唔應該為一句說話耿耿於懷，聽完就算，唔開心一陣間就算，要睇大局，唔通到個個俾人拉嘅時候，先知合作同團結重要咩？」
現階段，他相信各組織都會重思定位，「不過無論點定位都好，激烈民主派係民主派，對話嘅民主派都係民主派呀，最緊要係咪堅守到個立場，喺民主目標內抗爭。」
公民黨黨魁余若薇直言政治上不會有永遠的敵人，也沒有永遠的朋友，「只要目標一致，兩條腿走路冇問題，只係大家性格唔同。」她不擔心泛民日後合作，反而憂慮泛民被統戰、分化，力量被削弱，大家要互相提點，「之前李剛（中聯辦副主任）見咗啲民主派議員，傳媒問佢點解唔見晒所有泛民，李剛就話『因為呢啲人唔支持公投』，呢句說話係特別講畀支持公投嘅朋友聽，我哋一定要小心，千祈唔好俾佢分化，佢想激大家，希望大家因而疏遠其他民主派。」
目標一致只是手法不同
社民連主席陶君行也同意，泛民對民主運動的大目標一致，只是手法不同，否則不會成為不同的政黨，並形容各泛民政黨之間的關係是「既競爭且合作」。
對於未來方向，他指5.16之後，社民連、公民黨和民主黨曾坐下討論針對政改方案的工作，大家不謀而合有共識，「我講笑咁話6月23日社民連負責包圍立法會，Audrey（公民黨黨魁余若薇）就話佢負責6月17日辯論，咁民主黨唔講都知，咪負責同阿爺溝通。各司其職，大家各有競爭優勢，做番自己。」
記者：張嘉雯