食品價格大幅回落，即將公佈嘅通脹數據料未及反映，但有望減少市場對央行加息憂慮，大行已調整對息口看法，認為中美兩地今年都未具加息條件。大行寫報告都係跟勢做，馬後炮多過前瞻性，經濟情況有變當然轉吹淡風。歐美各國經濟數據同樣兒戲，歐洲各國採購經理指數話修訂就修訂，難道當初發佈嘅數據係老作？
內地經濟數據經常被美國話有水份，但起碼講嗰句就係嗰句，唔會彈弓手。講開水，近期已經大把人開始寫，有冇機會成熱炒焦點，還看發改委會否趁食品價格回落，把握機會調整資源價格。先有天然氣出廠價上調，然後係新疆終於改革資源稅，下一個加價領域相信非水莫屬。
國務院最近轉發發改委關於深化經濟體制改革重點工作意見通知，指出要穩步推進水價改革，包括有條件於地區實行居民用水階梯價格制度。簡而言之，就係發改委將推出「可加可減」穩定水價機制，改善水務企業虧損嘅局面。
粵投北控水務諗得過
目前供水公司收費冇得加，但成本就不斷上升，加上地方政府為吸引投資，好多時提供水費折扣，因此業界估計，去年底全國超過一半水務企業都要蝕錢。
中國水資源短缺，應有水嘅地方長期乾旱，南方卻出現水災。要鼓勵珍惜用水，加水費是最快最直接方法，5月初成都已加水價超過3成，預料陸續有地方獲准加費。水務股上周炒加費癲一輪過後，股價已回調不少，穩陣之選不妨留意現金流強勁嘅東江水粵海投資（270），除咗供水仲有物業投資、收費公路、酒店及百貨，現價只反映水務部份，但走唔甩綜合投資控股股價較落後嘅宿命，唯一重新體現價值嘅生機，將來自效法其他紅籌窗口股咁重組整合一下業務，又或者玩回歸A股。
「水份」較重則有北控水務（371），除咗北京，喺廣東、浙江、山東等省市擁有7座水廠同47座污水處理廠，仲以BOT形式投資，在建水廠有20座。
胡孟青