為息民怨，富士康（2038）決定大加員工薪水三成，動作係業內少見。內地「血汗工廠」充斥，富士康事件於內地引發迴響好大，當局為免釀成一波又一波的工潮，勢必借勢整頓民工福利水平，預期要求廠商加薪潮將掀起。
工業股梗係唔掂得，相反內需股就有得諗，事關加薪潮爆發後，最受惠股種就係消費股，因為民眾手頭有錢，自然夠膽消費。從相關板塊股份入手，近期走勢漸見改善的春天百貨（331）值得跟進。該股去年業績較招股時所預測為高，反映盈利能力不俗。
春天百貨近年積極進軍特賣場（OutletMall）業務，其吸引力不遜百貨店，亦係搶佔中檔以下消費者招數之一，打頭陣一間位於北京，由於係公司大股東持有，集團目前只負責該店管理，不過據招股文件顯示，春天對該店有一項選擇權，相信未來收購機會甚高。
春天昨升1.8%，收2.32元，股價已擺脫弱勢，伺機買入，獲利先睇2.60元。
方星俠