二人女子樂隊at17今年嘗試分開發展，成員林二汶最近為新戲客串一角，更為電影擔任配樂。首次接觸電影配樂，為她帶來無限新鮮感又學到更多，希望可以在這方面發展。
女子樂隊at17今年嘗試分開接工作，其中林二汶最近有份客串新片《前度》包租婆角色，而且更初嘗做全套戲的配樂。這次帶給二汶無限滿足感，早前她接受訪問時，談得眉飛色舞：「今次真係好開心，由頭到尾嘅音樂都係自己生產出嚟，好滿足。」
試映測反應
林二汶謂最初獲邀做該片的配樂，毫不考慮便答應，初嘗獨立製作，她說：「初初諗不如at17一齊做，但我後尾都想自己試吓，想畀機會自己成長。如果有Ellen（盧凱彤）一齊，我會依賴。最初真係唔知由邊度做起，我有搵過人山人海嘅人幫忙，之後又不斷同監製杜汶澤傾，了解套戲嘅概念，同埋佢想要啲乜嘢。之後我就遇到技術問題，作好晒歌，但唔識彈琴，又唔識mixing，彈結他又唔夠好，要捉住人哋幫手。今次試過，好想繼續做落去，所以打算學樂器，再學好結他。」
林二汶更舉行試映會測試反應：「真係搵咗廣大市民o架，叫觀眾嚟睇戲，不為意我喺側邊就播啲音樂出嚟，測試有乜嘢反應，睇清楚觀眾邊個位有特別反應，其實寫歌唔難，但係得幾秒嘅歌就要掌握得好。」。
採訪：王連連
攝影：仇志德