活樂遊2：
金針插頭　六百萬禮服　沖繩試嫁

點解要去沖繩影婚紗相？特別囉！同樣有藍天白雲靚靚海邊教堂，坐飛機不用三個鐘，化妝又啱心水，左計右計，都好過消費貴多多聲的關島。而且橫豎都影，影完例牌的白色婚紗，再來一個傳統沖繩婚禮，sharp到爆的紅黃藍紫，一石二鳥！

記者、攝影：陳慧敏
鳴謝：新華旅遊

32家房客體驗琉球

就說是條文化村嘛，不讓你時光倒流學幾樣古老工藝，如何擔得起此大名？村子裏有32家相連的古老工房，可以親身體驗跳舞、三線弦琴、玻璃工藝、紅型染、藍染、陶藝、黑糖製作甚至用掃把製作笛子等，宣傳單寫起碼有101個學科，隨季節同時間更替，這邊廂你在學打花鼓，那邊廂在學作紅型染、後面一排學生有人一手泥、一手顏料或一手白布料，一個月，你話學唔學得晒呢？

針向外　保新娘

今回同Liz在文化村試穿層層叠的沖繩禮服，個來鐘頭就可以大變身，日本新娘還是興白雪雪，雖不及京都舞伎般白到面目全非，但彩筆一掃，油畫咁厚的顏料仍即刻美白！新娘頭則似個麪碗，仲要由後向前插支鋼針，針尖向外，保佑新娘幸福。跟住兩個大媽合力幫Liz化妝着衫索腰帶，下下有力，厚厚的三層腰帶下來，Liz：「我腰都彎唔到喇！真係要人幫手着鞋先得喇！」紅，是中國的傳統吉祥色，而沖繩最高級的結婚禮服，則是明亮的橙黃色，裏面搭上繡了金線的艷藍色服，以及紅色繡花腰帶，這一套就叫價6百萬日圓，近51萬港元！吓？頭先見文化村裏借穿古裝衫影相的試着體驗才1,000日圓咋喎！本來扎扎跳的Liz同着住件衫行來行去的我都呆住了，「死啦！我踩濕咗對襪呀起碼百幾蚊啦！」Liz抽住條裙雨中哀號，從此每一步都觸目驚心。
婚禮過程嗎，除結婚前夜男女家的準備外，男家只要待在家裏，等新娘的眾姐妹抬住「神轎」，將新娘送到男家去。及後，就是三天豪食之宴，食完男家食女家，還要感謝所有幫過忙的親朋戚友又食一餐。講起，都肚餓，行過隔籬版食個飯先。

新娘裝身！

文化王國村

地址：沖繩南城市玉城前川1336（於那霸巴士總站乘巴士約55分鐘車程）

收費：民族服試穿體驗$85-$670
二人傳統結婚禮服$12,000（影樓景，包200張相）。文化村實景價錢另議。