曾志偉、魯芬、羅仲謙同Freeze等前晚到將軍澳電視廣播城錄影無綫節目《超級遊戲獎門人》，志偉故意安排魯芬同羅仲謙一組玩「蒙眼啜」遊戲，二人用嘴鬥吸紫菜。曾主演電影《女子監獄》嘅魯芬見靚仔故意飛擒大咬，又伸脷又咬羅的嘴，志偉忽然拎開紫菜，魯芬因太用力撞傷羅仲謙的嘴唇。
志偉教仔多女
玩「坐波波」嘅時候，由於魯芬胸前偉大，加上體形如河馬般健碩，佢助跑向羅仲謙身上飛坐時，硬餵羅仲謙食波餅。志偉笑魯芬十足火車般龐大，羅仲謙即刻話：「好有壓迫感，我都紮行馬。」Freeze玩「爆波波」時，即使已經着晒T恤但一樣失手走光；問曾隆胸嘅甄穎珊用胸壓爆波怕唔怕壓傷假胸？甄穎珊話：「我問過醫生，撞擊力唔過50kg冇問題，撞車傷肋骨就係50kg嘅力。」
另外，志偉講到囝囝曾國祥同o靚模A.Lin的緋聞，同埋有傳佢個仔一腳踏三船勁花心，點知志偉笑笑口咁講：「呢個仔冇用啦，得三個，冇父風，唔好超過300個，30個就差唔多，多咗一日畀自己休息囉。」志偉仲話從唔干涉仔女嘅感情事，又話唔記得有冇見過A.Lin喎！
