3分鐘劈入大浪灣　辣妹JCW曬太陽

我最愛嘅夏季終於來臨，相約三五知己去海灘曬太陽絕對係每年夏天嘅一大樂事，不過呢排天氣時晴時陰，要抓緊飄忽陽光，必須有架速度驚人嘅開篷靚車作伴，MINIHK剛引入嘅CooperSJCWCabrio係我心目中嘅首選，1.6公升配Turbo引擎竟然可以爆發出211匹嘅驚人馬力，大浪灣嘅陽光與海灘，原來3分鐘就可以到手。

記者：許維雅
攝影：林栢鈞、黃子偉
Model：YoYo、Mavis

時速238公里駛入灘

早前MINIHK為慶祝荃灣Showroom開幕，宣佈引入全線JCW系列，以往只得Cooper一款選擇嘅JCW車系，家加入Cabrio及Clubman。之前開篷版Cabrio率先到港，同佢只喺Showroom短敍，今次終於有機會同佢遊車河。有開篷車同遊，最想去嘅地方必然係海灘，首選大浪灣，貪佢灘仔細細夠氣氛，最緊要係錶位多易泊車。相約朋友由筲箕灣出發，CooperSJCWCabrio雖然只配備1.6公升引擎，但經過JohnCooper調校嘅Turbocharger渦輪增壓，最大馬力有211匹，轉數低至1,850rpm就可輸出260Nm扭力，比起只得175匹馬力嘅普通版CooperS勁得多，話咁快就入到大浪灣。有幾快？以0至100公里只需6.5秒、極速每小時238公里嘅表現，筲箕灣入大浪灣嘅路程約11公里，計計數，3分鐘就到。

15秒閂篷快閃

所謂3分鐘，當然只係數據，唔包括超速抄牌、入彎收油等，大潭道及石澳道出名彎多路斜，六前速手波轉檔做到人車合一幫助攻彎，新車更有Overboost功能加快起步反應，起步時畀油大啖啲，可立刻提升20Nm扭力至280Nm，輕輕鬆鬆15分鐘就到埗。JCWCabrio沿用經典嘅紅黑色，即使加上大量碳纖配件、放大鬼面罩及擾流器，依然係部啱女生嘅Cutie車，只不過今次辣好多。揸住呢部換上黑色軟頂開篷嘅JCWCabrio去沙灘，不但休閒感更勝Cooper，其內櫳空間感覺更闊落，攤喺真皮軟熟座椅上已經可以來個日光浴前奏。急不及待跑落沙灘玩，無情黑雲卻突然殺到，惟有衝上車即閃，只要保持車速30km/h以下，就可一邊開車一邊關軟篷，15秒快速搞掂，免被淋雨影響心情。