「財金圈履歷核實署署長」股壇長毛DavidWebb，又惹事上身！不過呢勻比較有新意，唔係佢踢爆人哋假學歷，而係佢「經理人」涉嫌向人收錢賣貼士。
哦？乜Webb有經理人o架咩？事緣係咁嘅，上個禮拜畀佢撰文話頒發野雞大學學位嘅AKMA（亞洲知識管理協會），噚日喺報紙登咗個廣告（下圖），話佢哋最近接獲「一位學員」通知，畀一個自稱DavidWebb嘅經理人來電，聲稱可以提供一啲股票內幕資料，仲索價10萬銀，事件家仲查緊。AKMA話，家正式向學員呼籲，呢種金融交易方式係違法嘅，叫大家小心。
究竟單嘢搞咩鬼呀？搞到咁可大可小喎！係咪阿Webb仇口太多俾人整蠱呢又？
對於自己無情情捲入呢單「賣料疑雲」，身處外地嘅股壇長毛用電郵覆番華華，話自己完全唔知呢單嘢，仲問個廣告係咪真係提到佢個名。不過，唔知還唔知，長毛都估計可能係有人想搞事，令佢周身麻煩。咁搞事嘅，又會係邊啲人呢？
李華華
mailto:[email protected]