歐洲問題冇迹象解決，市場資金緊張情況惡化。3個月期美元倫敦銀行同業拆息上周突破0.53厘的近10個月新高，存貸息差再放大的話，就會加重聯儲局加息壓力。歐元區各國互不信任，銀行喺歐央行嘅存款逼近歷史新高。
危機其實一早已爆發，只是經歷過金融海嘯後，大家習以為常，唔驚信貸緊縮，反而更驚來自北韓及中東等地緣政治風險。希望唔好開口中，然而投資者唔好對恐怖主義鬆懈。另外，早前有報道指，過去4年可能有超過9.2億英鎊嘅沙地資金流入阿富汗，極有可能贊助恐怖分子之用。今年火氣重，慎防擦槍走火，以色列連國際人道救援船隊都唔放過，呢種霸權主義作風遲早玩出火。
難怪溫家寶總理出訪日、韓都不忘發表中國「不」威脅論，又刻意喺北韓問題上保持低調，都係想減少不必要嘅磨擦，努力搞好經濟。佢係第一個國際領袖出聲，話大家唔可以退市，果然唔夠兩日歐洲又爆大鑊，雖然暫時對股市影響不大，但千祈唔好睇小信貸收緊對經濟嘅影響。
四方水緊 來港度水
因為呢次銀根短暫唔單止係歐美，連內地都喺調控下乾晒塘，上海銀行間同業拆息（SHIBOR）全線抽升，隔夜息升至今年新高2.77厘水平，寄望6月公開市場解禁嘅7800億元人民幣資金，可能係放鬆銀根嘅及時雨。
全世界以為大陸最有錢，紛紛來港上市集資，但實情係外強中乾。唔單止內房股集資困難，農業銀行上市又一波三折被要求減價，內地企業想上市都要移船就磡。著名內地補習社環球雅思，剛進入美國納斯達克上市大直路，另外仲有5間教育機構排緊隊，據了解同中證監遲遲未能批出上市申請有關。
走出去Good水係絕橋，反正老外們最愛BuyChina，任由佢買個夠。呢次全球銀根短缺，反而令香港漁人得利。睇金管局數字就知，4月銀行貸款按年增加15.1%，當中用於香港以外地方的貸款更升20.7%至6790億元，佔整體貸款增長19%。由此可見，不少包括內地及跨國企業已在港「度水」，隨着同業拆息上揚，有望改善整體息差表現，本地銀行股有機會喺全球信貸緊縮下，成為唯一得益者。
胡孟青