市場新趨勢之一係節能減排，全球各國都絞盡腦汁要搵方法減少能源消耗，其中一招就係以節能熒光燈泡取代傳統白熾燈泡，業務上食到呢個商機之股份都有幾隻，新上市冇耐的雷士照明（2222）可算係國內領先企業之一，其股價近日似見異動，昨升1.4%，收報2.13元，可以酌量跟炒一轉。
雷士照明目前在內地有5個生產中心，去年底止，集團可提供約9000種燈具產品、1500種光源產品和200種照明電器，銷售網絡遍佈全國，共有超過2400家專門店。根據中國照明電器協會報告，以09年收入計，雷士係全國最大照明品牌供應商。
高盛係雷士上市保薦人，近日股海唔係咁就，但高盛護航姿態十分積極，聯交所SDI顯示，高盛於5月25日以均價1.936元，增持雷士至12.29%，有保薦人出手「照」住，唔怪得股價似有勢起動。雷士上市以來未曾大炒過，同期隻歐舒丹（973）已炒到飛起；雷士有概念又有業績支持，應該買得，第一站先睇2.50元。
方星俠