E3就到，一概勁Game收起晒！但本周有隻AlphaProtocol要留意，間諜遊戲竟歸類RPG！你可當佢第一身射擊，再加《HeavyRain》用對話作諜戰滲透；但最頂癮係啲對話，模擬《鐵金剛》、《叛諜追擊》同《24》幾套間諜片經典，型、Pro、辣炒埋一碟，打機啫，唔使考電影史呀？
記者：許福合
間諜 地下工作者
故事背景幾悲凉下，遊戲主角MichaelThorton原本係諜報員，不過喺一次任務中失敗，俾美國政府視為棄卒，連頂頭老細都將佢出賣，從此轉做地下諜報員，從此為錢、為報仇而開工；遊戲以RPG同Action兩部份組成，由人物成長、NPC互動收集情報，以至匿蹤滲入、技擊槍殺乜都要識，玩法幾多變吓；好彩開發廠係有《NeverwinterNights》同《Fallout》名作在前嘅Obsidian，玩落都算有信心啲。
揀啱對話 有錢有妞
開Game要先做職業設定，感覺有啲似MMORPG；遊戲嘅成長系統，係以玩家完成任務所得技能點數，幫Thorton升級，而隨你開初所選擇Soldier、TechSpecialist、FieldAgent三種職業，佢會自動相對應地從武器、匿蹤、道具等三種能力升級；想玩得自主啲？必選Freelance職設，咁就可隨你喜歡自由加點。
同線人傾偈嘅DSS系統，係一個非常鬼馬嘅新點子！能否完成任務，除咗考你嘅操控，有時亦要睇有無線人幫！收集情報時要經常與NPC對話互動，當中對話框嘅選擇，包含咗占士邦嘅「圓滑」、《叛諜追擊》龐積遜嘅「專業」，同《24》鮑志傑嘅「挑釁辛辣」，玩家要在限時內選擇，回答方式因人而異，如果佢覺得你順眼，畀多啲情報資料只屬等閒，甚至會直接畀錢資助你升級買槍、買道具，不過最激情都係啲女線人，冧得佢掂隨時引發「邦女郎」劇情！
扮鬼扮馬偷番薯
間諜任務，唔少得嘅當然有滅聲槍爆頭、後頸鎖斷頸、暗黑夜潛「偷番薯」啦！如果你喜好「爆醬殘殺」之道，求其搵隻美式限制級FPS都勁過佢啦！所以遊戲除提供多種技擊武器同槍械之外，仲有一堆頂癮道具，例如變聲警報器、電子鎖手榴彈等，有時甚至要改服易容，戴埋假髮、大眼仔扮鬼扮馬玩潛入，總之就好似睇緊占士邦差唔多啦！進行任務時，會遇到好多諸如開鎖、入侵電腦等小遊戲，令遊戲增添不少趣味。
一個捷運站台灣走紅？
《AlphaProtocol》未出！喺台灣已極具人氣！點解？事關有場景勁似台灣捷運；如果係高鐵，唔知香港Gamer會唔會都咁大反應呢？
Profile
主機：XB360/PS3/PC
廠商：Obsidian
類型：RPG
遊戲人數：1人
