發改委大幅上調天然氣出廠價24.9%，佔內地天然氣市場超過八成份額的中石油（857）理應直接受惠。有券商估計，今年中石油盈利有望增加184億元（人民幣．下同），約佔去年盈利18%。
呢個世界通常唔會咁着數，好似去年中石油向中央交特別收益金，由853億元大減至200億元，點知新實施嘅燃油消費稅卻大幅增加，結果所得稅之外嘅其他稅款交多咗9%。今次情況可能相類似，有傳新疆資源稅費改革快將落實，按稅率5%計，中石油或需上繳323億元，加上呢次成品油又要減價，加氣價真正利好作用有限。
呢次除咗加出廠價，亦取消油氣價格雙軌制。所謂雙軌制源於80年代改革開放，中央為籌集天然氣開發資金，鼓勵企業以天然氣生產，對部份好似化肥業有價格優惠。呢啲俗稱「氣頭」嘅化肥業，以較煤電平嘅天然氣生產，利潤較「煤頭」化肥廠高20%。不過自雙軌制取消，優勢不再，亦解釋咗點解券商隨即調低海油化學（3983）盈利預測。
北控防守性高
發改委理順天然氣價格偏低嘅局面，對推展全國天然氣發展同普及有積極作用。取消雙軌制可減少特權行業嘅需求，加價後可拉近國內與進口天然氣價格差距，有助紓緩供應緊張局面。
縱使燃氣股因政策未有即時惠及供氣商而插水，市場對地方政府即將陸續上調氣價仍有憧憬，供氣商有望受惠。眾多燃氣股中，規模最大為北京控股（392），去年旗下北京燃氣售氣量56.9億立方米，增長16%；而北京燃氣持股40%嘅中石油北京天然氣管道，完成輸氣量增加18%至144億立方米。北控嘅燃氣業務佔整體淨利潤72%，目前擁有超過340萬燃氣用戶，市場預期今年燃氣網絡將可覆蓋北京市94%地區。集團旗下仲有啤酒、水務及收費公路，防守性較高。
增速較快嘅仲有民營新奧燃氣（2688），喺全國79個城市有470萬住宅用戶及1.4萬工商用戶，覆蓋城區人口4300萬，全國44城市有加油站351座。家用及加氣站去年增長理想，盈利分別增加33.9%及7.9%。由於加出廠價在先，一眾燃氣股應聲下跌，燃氣商照計遲早有望加價，待沽壓過後可多加留意。
胡孟青