六四21周年前夕，香港民主女神像幾乎無處容身，內地人民冇可能公開悼念，不過向以出位見稱嘅《南方都市報》卻打出一個漂亮「擦邊球」，向用血肉之軀阻擋坦克前進嘅王維林低調致敬。
網民微博廣傳被河蟹
踏入6月呢個「春夏之交」敏感時候，《南都》噚日喺B16版以慶祝6.1國際兒童節名義，刊出多幅「偽兒童 真童趣」漫畫，講述兒童興趣會影響日後職業取向。驟眼睇冇乜特別，但原來其中一幅漫畫，竟然涉足大陸最森嚴政治禁區，絕不兒戲。
呢幅破格漫畫，畫一個小童喺黑板上作畫，畫嘅係三輛坦克車，前面再畫一個人。呢個畫面，係咪似曾相識呢？好多人一睇，都同八方一樣，即時回憶起21年前北京街上嘅畫面，就係王維林單人匹馬在一列坦克車隊前面，呢個畫面，好多人不想回憶，但始終未能忘記。
呢幅漫畫署名「響馬」，畫中仲有個疑似民主女神像手持嘅火炬，又寫上「校報1985年5月第一期」，是否有特別含意仍待推敲。呢幅政治漫畫好快就被眼利嘅網民發現而且在微博廣傳，河蟹亦隨即發功，圖畫瞬間就在《南都》網站上被刪除，不過喺網頁上B16版嘅縮圖仍能倖存。
好多網民都激讚《南都》有吉士，慶幸每年六四周年前，仍然有良心和記憶都未泯滅嘅人，運用智慧巧妙悼念六四；有人話相信《南都》呢幅漫畫可能只係開始，「我們期待更多的創意」。
曾批評中共黨國不分
《南都》形象敢言，打所謂「擦邊球」曲線法批評官方政策或諷刺時政唔係第一次，今年4月歷史評論版刊出題為〈愛國家不等於愛朝廷〉文章，借古諷今批評中共黨國不分。內地網民悼念六四蠢蠢欲動，前晚內地新浪微博出現大量與六四有關圖片，圖片由一名聲稱在海外嘅網民「世六說實話拾（倒轉讀即「實話實說六四」諧音）」上傳，可是新浪審查嚴格，半小時內就河蟹晒。
好多人奄尖腥悶嫌支聯會悼念活動廿年如一日冇新意，相比內地人要扭盡六壬發揮創意先可以悼念六四，誰更幸運？
mailto:[email protected]