小妹啱啱去完上海，入世博當日撞正人數破50萬，排隊排到儍，寧願去其他地方玩。去到新天地以為返咗香港，因為旅發局搬咗成個香港過嚟做宣傳咁滯。喺度撞到上海國際旅行社總經理趙德祥，佢話可以報團入世博，排少啲隊。但我話香港得一間旅行社打正旗號搞世博團，預約埋入館，而且我哋鍾意自由行嘛。
趙總話，自由行港客可以考慮嚟到上海先參加「世博直通車」，係上海旅遊集散中心搞嘅世博localtour旅遊巴士團，每日有多班出發。集散中心為自助遊人士而設，雖然上車地點比較遠，但接受報名嘅旅行社，會喺出發當日到旅客住嘅酒店接送去集散中心，玩完再送返酒店。
世博預留部份位置畀旅行團預約入中國館，但大部份時間都爆晒。不過唔少團最後會取消booking，大會預約系統會即時顯示有新空缺，唔少內地旅行社家就24小時上網睇實，一有位就攝去預約。上海旅行社近水樓台，預約入團成功機會率可能高過香港。不過，報團亦唔保證一定約到中國館，大家要事先問清楚。
新天地變小香港
香港旅發局亦趁世博拖馬去上海踩場，用麥兜、米奇、同威威獅令等香港Icon做親善大使，將旺區淮海中路同新天地變成小香港，務求令內地客去完上海，下站再去香港。
喺上海俾小妹遇到嘅旅發局主席田北俊笑住話，世博嘅內地參觀者好多係豪客，搞到成個上海「貴酒店滿晒，想去靚餐廳訂位都訂唔到。」據講呢次宣傳吸客要用400萬元，連同其他推廣，預料夏季來港內地客會勁升三成。
電郵：mailto:[email protected]