內地超女周筆暢啱啱日前出新碟，一向鍾意以中性打扮出現嘅佢今次180度大轉變，染上一頭金髮以女人味造型示人，出咗嚟嘅效果fans都相當受落。唱片公司為咗隆重其事，仲專程請嚟台灣著名MV導演鄺盛為周筆暢執導新歌《魚罐頭》嘅MV，點知唱片公司一番好意反而變成害咗周筆暢，因為細心嘅讀者報料，指呢個MV明抄一套曾得獎嘅短片《NuitBlanche》。
似到十足十
馮仁昭梗係即時去驗證吓，哇！睇完可以話周筆暢個MV真係似足百分之九十九呀，閒閒哋都可以講出唔少兩者相似嘅地方，首先大家都係以黑白為色調，一開始都係由大城市再慢慢影向大廈再轉去地面，主角就企喺大廈門口，女主角同樣都係坐喺餐廳中。鄺盛執導嘅MV跟足人哋玩立體同慢鏡視覺效果，得獎片段嘅男主角係被車撞，而周筆暢就發揮異曲同工之妙，俾條巨魚撞，之後女主角穿過玻璃一幕，根本係十足十一樣，連得獎片中男女主角面對面，鄺盛都抄埋叫周筆暢同女演員面對面好似想錫錫咁，你話咁啱得咁蹺真係講都冇人信。
抄橋有前科
其實鄺盛抄襲一早已經有前料，不過佢有佢照抄，依然唔少紅星好似周杰倫、Twins咁搵佢拍MV，聽聞佢仲有意做電影導演。而《NuitBlanche》之前得到電子藝術大獎（PrixArsElectronica），由加拿大導演ArevManoukian所拍，的確係好冷門，不過唔少網友係通天曉，任何嘢都逃唔過佢哋嘅監察。