不少人認為，今次公投，成也社民連，敗也社民連。
對於這個觀點，社民連主席陶君行拿出一部計數機，算給記者看，「全港330萬選民，上屆投票率45%，即150萬選民投票，泛民同建制派得票大概係六、四之比，泛民約86萬票。港大今年1月民調顯示，三分二自稱民主派支持者話會投票。即係話，5.16佢哋其實出晒嚟。」
堅持原則 手段可以靈活
陶君行想說的，是自中央下令冷處理，建制派保皇黨齊杯葛，公投17.1%的投票率絕非他們意料之外。投票前夕，他仍打出100萬人投票的目標，是作為口號，「好聽啲」。
但他承認，確有部份選民因為社民連，對投票猶豫甚至不投票。公投之後，社民連不是沒有反思，「我外母幫我向啲中年婦女拉票，佢有句總結，話『好心你哋啦，有時講吓道理，唔使咁樣鬧人。』」陶君行的外母，總結得很有力。
5.16之後，社民連舉行了一次近80人參加的反思會，談到「形象、定位問題」，「我哋啲人太剛性，咁可以不斷鞏固自己嘅支持者。但香港咁保守，過去都係咁平和嘅社會，好難將稍為保守啲、溫和啲、自認為理性嘅人拉埋你身邊。」陶君行反省之後的結論，是「原則要堅持，手段係咪可以靈活啲？」
公投醞釀初期，社民連向民主黨「叫陣」，是導致部份民主派支持者不支持公投的其中一個主因。陶君行解釋，當時提出「何俊仁站出來，民主黨預埋你」，是因為公投沒有民主黨參與是一個缺失，「佢嘅缺席對民主運動發展有好深遠影響」。
公投過後，陶君行承認有值得檢討之處：「道理喺自己度，唔需要咁大聲去指罵人哋，譬如追女仔，都要溫柔啲，吓佢，特別對一啲猶豫嘅人，咁樣未必游說到佢企喺你陣營。」社民連有自己的「市場定位」，但遇到公投、區議會選舉等要取得「簡單多數」支持才能勝出的戰役，「呢種方法會出事」。
明年區選 擬包裝成公投
論成敗，他認為公投「唔可以話好成功，達唔到百萬人撐公投嘅效果，但起碼畀香港人一次機會，和平理性表達意見。」他更否認是失敗，「若果敗，就唔會有余曾辯，亦唔會有民主黨、普選聯同中央政府面對面嘅溝通。有50萬人無懼壓力出來投票，先有呢啲成果。」
很多人說社民連是公投大贏家，一開始就「有賺冇賠」，下屆選舉定有進賬。陶君行估計，公投運動前，社民連約有700至800黨員，現在約有近1,000人，「增長同08年選舉後差不多。」但他強調，這些是「unintendedconsequences（意想不到的效果）」。「喺香港參與政治有太多政治計算往往得不償失，民主黨就係呢個問題。」
明年區議會選舉，陶君行正構思是否可以包裝成另一次公投，「泛民冇人出選嘅選區我哋就攝位，搵啲年輕人參選，到時民主黨冇得走，再講起義，民建聯又唔同我哋對決呀？」 本報記者