陸叔（陳永陸）噚日響馬場搞咗個party，慶祝開咪講股10周年，多位財金高官包括財爺曾俊華、港交所（388）主席夏佳理都有到場，佢兩位原來都係陸叔粉絲，已經聽咗陸叔節目好幾年！貴為香港全職講股佬第一代「鼻祖」，一吹雞，城中所有股評人後輩到齊咁滯，於是造就咗呢張集老中青、由60前至80後股評人嘅大合照……經歷人生「講股」第一個10年，陸叔話最難忘係08年金融海嘯嗰陣風雲變色嘅場面，佢話好enjoy做「財演」，希望一直做落去。咁循例都問佢點睇後市喇，佢話下半年應該冇問題，但今個月大市可能再試底位，散戶可以趁機買吓平貨咁話。
李潤芳攝