【本報訊】問責官員繼續分頭推銷政改方案。教育局局長孫明揚昨在午餐會上，形容政改與近年推行的教育改革相似，同樣需要慢慢一步一步向前行，希望個別團體「摒棄以我為尊」的心態。席間有中學校長指高官落區宣傳時應做好準備，以得體對答應付市民訴求。孫明揚解釋，官員早有既定答案，「但係咁多人叫囂，我哋講都講唔到多兩句。」
孫明揚：早預備好答案
孫明揚昨與保良局董事會午餐聚會演講以教育改革論政改，認為政改必須按部就班工作方能獲得最大成果，「就好似新高中學制，我哋都做咗幾年準備，一步一步咁行，先唔會做成反響。」他呼籲社會理性討論，個別人士更應放下成見，「摒棄以我為尊、真理永遠在我嘅心態。」
席間一名保良局屬校校長向孫明揚表示，近日接連見到高官落區宣傳政改，沿途更被一些「阿哥阿姐」圍堵，他認為，各高官事前應做好準備，「知道唔同人有唔同意見，就應該有啲得體嘅答案。」孫明揚回應指，官員早預備好答案，但奈何有人選擇罵街中斷對話，「好似家我哋和平對話，咁大家就有溝通，而當時咁多人叫囂，講都講唔到多兩句，（唔回應）係一個取捨問題，唔係我哋識唔識做嘅問題。」
孫明揚會後又表示，會繼續與各官員落區宣傳，對於早前庇理羅士女子中學教師吳美蘭公開批評唐英年，他表示不會與對方或校方聯絡，「我認為冇咁嘅需要。」