歐元區失業率飆上雙位數，股海淡風再刮！港股霎時又下插。同一位股壇老行尊傾開，佢話大市雖跌，但個別股份如業務有動作，大可唔跟個市而照升，不過，呢樣就要睇股份幕後實力。
市場各板塊中，圍繞電影及動畫等股份消息都算唔少，好似番薯梁出山做意馬國際（585）主席、帝通國際（8220）獲周星馳注入電影相關資產，仲有「賓卡」出身的冼國林亦拍戲拍上癮，做埋國藝控股（8228）主席。另外，星俠上周品題過的星美國際（198），其大股東近日高調曝光，市傳注資動作即將殺到，要密切留意。
內地電影票房收入逐年倍升，有排未見頂，文化產業亦有國策重點扶助，所以電影股應該有計。橙天嘉禾（1132）今年首季營業額2.9億元，純利同比大增5.6倍至3300萬元。集團近期在內地雖有兩宗物業租賃被終止，惟影響已反映晒，該股近月由1.15元一直調整，昨續跌6.3%，收報0.75元，跌幅夠深，可待下試0.70元水平博反彈，短炒目標0.85元。
方星俠