二十年來第一次過大海，住酒店，入賭場，結果如何？梗係輸錢收尾啦。長賭必輸，此乃必然之理，亦有云打劫紅毛鬼，進貢法蘭西。佛誕之日，中午先到佛笑樓第二店（觀音像對面附近）吃飯，左丁山MCC到極，以名取義，以為「佛笑樓」係賣佛跳牆之類嘅粵菜，認真大鄉里，自己可以穿梭中環，去到澳門街，就係盲頭烏蠅。入到佛笑樓，方知可以食葡式乳鴿（十五天至二十天）、馬介休、非洲雞、焗蟹蓋等等，在香港未食過，覺得非常有味道。食到飽一飽，行返萬利酒店（Encore），路經美高梅金殿，有鬼掹腳，入到去睇吓，嘩，賭場咁大，好有維加斯feel喎，記得幾年前在拉斯維加斯入到MGM，賭場就係咁上下大嘅。自己唔識百家樂，亦唔敢玩啤牌，行吓行吓，見到有一張枱係賭大小嘅電腦機，每注最低額係十蚊，啱晒啦，於是十蚊十蚊咁玩吓，點知有一鋪捉中三粒二圍骰，加埋贏二千幾，開心到不得了，立即割禾青鬆人。走返萬利，諗住咁好運，不如乘勝追擊，走埋去賭兩鋪輪盤，二十五元一注，居然命中一鋪七號，一鋪三十三號，更加笑到見牙唔見眼。又係即刻鬆人，輕鬆到不得了。行過去永利酒店賭場，係咁意玩吓吃角子機，一蚊一鋪，居然贏咗五百幾，立即鬆人。呢次輕飄飄咯，行經一張甚麼「富有三寶枱」，只有兩個賭客，摸吓嗰袋，贏咗四五千銀，諗住咁大個人，怕乜荷官呀，一於坐低，希望博夠一萬。
起初贏吓輸吓，冇乜輸贏，點知坐在派牌第二順位嘅一位大陸人輸清籌碼後起身，第三順位嘅香港人攞咗大陸人嘅牌，鋪鋪贏莊家，莊家冇晒氣勢，益埋左丁山收番多少。但香港賭客贏咗一鋪大大嘅之後，就話賭錢最高境界就係見好即收，攬住女友離開。於是乎坐在第一派牌順位嘅左丁山就同莊家對賭，佢攞咗本來應該派畀香港客嘅牌，唉吔，死得嘞，佢鋪鋪揸三條、一啤、蛇等等，眨吓眼左丁山輸咗五千，非常肉痛，唯有抹汗鬆人，莊家笑笑口話：「嗰位香港客如果唔走，都唔知會贏幾多錢！」好彩，下一次到澳門賭錢，不知係那一年。