大抵都是我的錯。原本只想了解郭子健當年創作《打擂台》的原因，沒料到多問幾句，談話內容就扯到他那灰色的少年人生：中學時代牛高馬大，卻常遭童黨「圍逗」；以為家中苦練功夫壓出一字馬好巴閉？最理直氣壯那次一樣遭對方KO。回首往事，郭子健說時粗口橫飛，搞到寫稿都要特別處理，便知箇中有多痛。樂觀看痛苦，從小被打係好陰功，但郭子健淡然總結：「咁先係普通嘅人生，因為大部份人都係被蝦嘅多！」
記者：蔡俊業
攝影：伍慶泉、王文忠
服裝提供：Hare@CollectPointand2%（黃又南）
黃又南Profile：
原名黃德謙，2000年經朋友介紹認識導演陳果，處男演出《香港有個荷里活》後加入演藝界。2002年與徐天佑組成男子組合Shine，3年前暫停唱歌主力電影圈發展。曾參演《這個夏天有異性》、《葉問》和《殺人犯》等。
郭子健Profile：
美指出身，其後轉職場記和編劇，曾擔任葉偉信的副導演，先後創作《五個嚇鬼的少年》和《2002》等劇本；2007年上映處男作《野．良犬》，獲提名第27屆香港電影金像獎新晉導演。翌年完成《青苔》。
《打擂台》劇照
安定邨童黨圍逗
你和我中學時代總經歷過被人「圍逗」，然而聽罷郭子健跟又南的少年回憶，才驚覺自己經歷不過如此！
先交由郭子健報道。三年級之前他曾住過鑽石山和秀茂坪，區內治安差，郭太愛子心切，禁止他出街玩。之後搬入屯門，情況更惡劣，「嗰陣時住安定邨附近，非常雜，阿媽照舊唔俾我出街，但係一到放學就會俾飛仔逗，一直逗到中學畢業。」他說班中有人自認黑社會，涉及與鄰校學生恩怨，「所以每次放學，門口就必定企咗幾個人或者幾班人喺度等，哺一哺你，行過已經心驚膽跳。」有次放學嘗試直行直過，「結果對方從後趕上，鬧完之後就打！於是我哋就避到去屯門市公園。又有次試過坐喺度，突然有六七個人行埋嚟問：『喂！o靚仔你住邊？』同學話：『友愛囉！』班人就一個玻璃樽濕落我朋友度，大嗌：『友愛你住×晒呀?!』」
那時的郭子健不苟言笑，思想認真，以當時身高來說，照計在校內幾矚目才對：「已經一七八，以為好理想，點知女就媾唔到仲要日日俾人打！」他從電視中見到梁小龍演出的麗的電視劇《大俠霍元甲》、《陳真》、《大內群英》、《天龍訣》和《再向虎山行》等等，還有李小龍和成龍，嘩！看得整個人都熱血起來，一心想「復仇」：「成日要阿媽俾我學跆拳道、空手道或者功夫，但佢當然唔俾，惟有去圖書館借啲散打書嚟睇，跟住開始喺屋企練Sit-up同埋拉筋。」一步步來，拉筋先由梳化開始，繼而飯枱，最後挑戰碌架床，「嗰陣時真係擘到一字馬！」
四小積練武鬥揪
練武決心堅定，結果每天家中當課室，跟三位同學到戶外切磋，「喺屯門法院外面個『法』字前面比武。」四位學生當中連同郭子健，自稱「屯門四條積」，「哈哈！打完返屋企仲會寫秘笈，係買小楷的習字簿去寫。練咗咩嘢，有咩訣竅都寫晒落去，仲畫埋圖。」咁最後面對惡勢力有沒有幫助呢？「我學武術真係諗住用嚟報仇，但你越想打，就越俾人㩒住嚟打！」
16歲那年，「喺屯門法院都練到有少少成就感，心諗連秘笈都寫咗幾本，已經係師傅級，有咩理由仲要怕呢啲打壞仔?!」所以四小積一致決定，「以後見到呢類人，我哋都唔×會再耷低頭，一定要望住佢哋行過去！」結果有一天，在母校梁銶琚中學附近遇到一班童黨，「佢逗咗我個friend去鄧肇堅小學球場嗰邊，我就好×，大聲講：『××老母你同我企響度！』然後佢望住我哋，喺球場度跑出嚟，原來佢走去扯側邊嗰嚿磚，居然想用嚿磚來揼我，但就扯唔到，然後就扯隔籬條籬笆竹，已經好鬼蝦碌，之後就走埋嚟扯我件衫，我就打佢，成班友八個人湧埋嚟，呢次俾人打到爆缸，其中一個朋友個鼻歪咗！呢次係我唯一一次還手。」之後因為年紀都大，就再沒有同類情況發生。
柴灣道斜路擂台
屯門戰況激烈，坐在旁邊聽古仔的黃又南一樣不輸蝕，憶述當年一條筲箕灣柴灣道如何變成斜路擂台。「我一直住北角，中學入咗去筲箕灣東官立中學讀書，對面就係男校聖巴西流，樓下就係聖馬可，仲有慈幼係男校，加上有一個球場喺咁多間學校中間，爭球場唔打交就出奇！」他說自己剛剛入讀筲東官時，「一踏出後門就係第二個世界，所以我放假去興民邨買嘢，嘩，不得了啦，間間學校都喺度，成日都俾人問：『望咩呀望？』回應佢：『望你呀家?!』傾唔埋兩句就嚟料！」無論勝或負，回到家又要面對第二輪開戰，「老竇見你跛吓跛吓都知咩事啦，成日跌親咩，真係試過門都踢爛埋衝入嚟打我！後來去到中五之後就無再打，覺得打咩呢，沒完沒了。我記得有位朋友講過：『你打完交，有無諗過人哋爸爸媽媽嘅感受？』」
為老戲骨開派對
郭子健先後拍過《野．良犬》和《青苔》，劇本氣氛偏向沉鬱，今次和鄭思傑聯手創作《打擂台》，雖由劉德華投資800萬拍竣，卻原來是十年前的倉底劇本，「好多年前因為見到Teddy（泰迪羅賓）打band，inspired到我去諗呢個古仔。我覺得老人家以前曾經都有好勁嘅band，但家年華老去，仲可能有啲因為意外唔喺度，到佢哋再聚埋一齊打band嘅時候，個感覺好動人，不如寫一個咁樣嘅古仔啦。但係十年都賣唔出，直到做監製嘅林家棟今次同我傾，就靈機一觸，話不如拍班阿伯打功夫。」
單看海報便知道是笑片，問他是否想改變風格？「我覺得家太多人傷心失望，所以我應該要畀更加多希望大家。」亦想說凡事在於心，不在年紀。正如今次擔演主角的梁小龍和陳觀泰，當年都是一等一的武打巨星，扭開電視機看到梁小龍扮陳真，睇戲就有陳觀泰參演桂治洪的《成記茶樓》；然而二人隨年紀越來越大，參演角色跟功夫也漸行漸遠，「拍呢套戲，唔係要證明佢哋仲係天皇巨星，或者好打過甄子丹，而係想講佢哋仲打得，佢哋仲係好好揪，但無人知。就算梁小龍近年都有戲出嚟，喺《功夫》做隻「蛤蟆」都算，《軍雞》入面做日本仔喎，我同鄭保瑞講：你有咩理由叫小龍做日本仔？陳觀泰你搵佢客串，唔係俾人掟落樓，就出現兩個鏡頭之後然後死鬼咗，都唔係佢哋所長，咁好打、你唔俾佢打，識做戲、你又唔俾佢做戲。」所以整套戲入面真正要打的，其實是梁小龍和陳觀泰。計我話，如果連同十多年沒做戲的泰迪羅賓，在《天蠶變》演雲飛揚、片中客串警察的顧冠忠，還有陳惠敏、無記甘草許思敏、梁雄和陳勉良，這不就是一個老戲骨大派對嗎？
