車唔一定要夠豪夠惡至令人望而生畏，見到大大份嘅PickUp（農夫車），都好有壓迫感，有點像粗獷味十足嘅男人，講細心一定無份。不過見到經過小改款嘅三菱L200之後，竟連細微嘅駕駛享受都兼顧到，原來，「粗獷型男」都可以外剛內柔。
記者：趙慧敏
攝影：陳陶鈞
Model：Sansu@PureModels
換配襯新鮮
講到農夫車，一直都係小眾玩意，不過總有捧場客，試諗吓，車重近三噸，有個巨型尾斗，如果要用電油，條數真係幾襟計，用柴油驅動嘅農夫車，自然有佢吸引之處。咁仲唔止，車櫳設計媲美豪華房車，電動真皮座椅，恒溫冷氣，天窗等，一應俱全，既有舒適享受，又可以帶嚟豪邁駕駛感。不過始終L200推出咗一段時間，其間不時會配襯不同配件保持新鮮感，老實講，對貪新鮮嘅車主嚟講，可能會覺得有啲悶。聽講廠方已為L200推出Facelifted版，而且即將登場。新Look未曾亮相，好彩代理醒目推出L200Sportero小改款醒醒神。雖然外形上，流線車身及標準裝備如前置霧燈、電鍍側鏡、雙色外拋輸拱及特大腳踏等，已經成為L200Sportero嘅標誌，故此只在17吋合金輪圈上做手腳，稍為改改款，令整體感覺更為剛強。
Sporty贏SUV
要改，唔喺粗枝大葉上，反而從細眉細眼處着手，內櫳才是重點。中控台基本設施不變，反而中控台下方，竟意外地發現左右兩旁嘅座椅發熱按鈕，雖然近日香港熱氣逼人，相信呢幾個月這配套亦無用武之地，但諗到喺冷冰冰嘅冬天，一坐上座椅暖笠笠嘅感覺，真係夠晒體貼。據代理指，今次小改版本亦有喺增加操控按鈕、提升方便度上着墨，手掣旁就設有叉電按鈕，亦有按鈕遙距操控車廂與車斗之間玻璃窗嘅開關。講到性能，L200Sportero絕對唔係有姿勢無實際之流，作為四驅車，走崎嶇路面嘅能力當然屬基本，當然始終唔可以當正佢係一般SUV，可以陪你攀越60度大斜坡，而且有個大尾斗，亦減低靈活性，不過佢都夠晒Sporty，大尾斗放單車、滑水板甚至獨木舟一樣得，粗獷運動感比周街都係嘅SUV有過之而無不及。
引擎：2.477cc直四柴油Turbo
馬力：136ps/3,500rpm
扭力：32.0kg-m/2,000rpm
傳動：四前速自動波/四驅
售價：$329,000（自動版）$289,000（手波版）
查詢：27211111（寰宇汽車）
