劉嘉玲曾和台灣富商郭台銘傳緋聞，近期郭台銘的富士康員工連環自殺事件，哄動一時。劉嘉玲昨日表示並沒慰問郭台銘，但深覺事態嚴重，相信和管理層出問題有關，她更慨嘆現代人承受壓力能力太低，太易輕生，呼籲大家熱愛生命。
富士康13宗自殺事件，震撼中港台三地，大老闆郭台銘兩次飛深圳了解事件，仍未能阻止悲劇再發生。曾和郭台銘傳緋聞的劉嘉玲，昨日在尖沙嘴出席Delsey行李箱活動，為旅行篋簽名義賣作青海籌款用。劉嘉玲表示關注富士康事件，但並沒致電給郭台銘，她說：「呢件事幾嚴重，可能係管理層出問題。呢啲大企業，我未管理過咁多人，唔可以用好專業立場分析，但相信係出現問題，需要調整。」
戒蒲愛獨處
嘉玲更慨嘆現代人太易輕生，她說：「家啲人好輕視生命，以前啲人打仗都唔想死，家一打開報紙，就見到好多跳樓、自殺，好多人承受唔起社會壓力。輕生唔好，應該熱愛生命。」有指富士康是血汗工廠，嘉玲說：「唔知，我冇參觀過工廠。」
嘉玲直言現時少見朋友，包括郭台銘，多了時間獨處，她說：「因為皈依之後，習慣咗同自己相處，好舒服囉，來時（出生）一個人，走時（死亡）都係一個人，以前嗰啲喧鬧嘅生活，會影響自己思維。」她表示戒夜蒲，但仍享受和朋友淺酌輕談，少年輕狂歲月沒錯，但自己已到不同年紀。
不探偉仔班
梁朝偉仍在內地拍攝王家衞的《一代宗師》，嘉玲笑言拍五年已不錯，反正偉仔享受拍戲過程，兩夫妻早有共識及承諾，不會互相探班。問到少見面，豈非影響生仔大計，嘉玲說：「冇特別，選擇自己鍾意做嘅事，我哋都有通視像，不過唔習慣咁先進，好似微博咁，都唔係我，係公司開，我想有少少私隱。」她坦言掛念老公，她說：「佢好辛苦，瘦咗，體力上都down咗，負荷唔到，不過佢家身形好fit，佢呢個年紀嘅狀態，我都未見過。」
採訪：顏英儀
攝影：林德雄