學煲呔話齋，一石激起千重浪，一句「起錨」亦激起網民嘅無窮創意，繼續惡搞煲呔呢次咁有政治智慧嘅campaign。
紅藍兩色嘅「起錨」海報繼續幻化成不同版本，最應景嘅係將兩隻大字變成「平反」，側邊寫住「64」，仲襯上英文「now」字，即係「立即平反六四」。
另一款「賊船起錨」亦好搞笑，將煲呔、唐唐、鬍鬚曾、林D9、曾德成班官樣，key落荷李活電影《魔盜王》張劇照度，可憐有型有款嘅主角JohnnyDepp變咗核突煲呔，JohnnyDepp粉絲見到可能會投訴。
煲呔今次起錨除咗文宣俾人笑，公民黨議員陳淑莊噚日仲踢爆佢教壞細路，因為個「錨」字嘅讀音應該係「naau4」，而唔係「撈」。