社民連三子透過變相公投順利喺5.16補選回歸立法會，呢期忙於將幾個月前搬走嘅傢俬搬返入政府總部嘅辦公室。但明明重返議會已個幾星期，八方噚日都仲見到好多傢俬堆喺佢哋嘅辦公室外，反而辦公室嘅吉位仲大把，似準備搬走多過搬入去咁款。
「長毛」梁國雄唔否認啲傢俬係佢哋放喺走廊，但原來咁做係有原因，事關如果政改爛方案喺立法會獲得通過，佢哋會再次辭職。為免舟車勞頓搬嚟搬去咁麻煩，索性唔搬住就方便啲。社民連支持者成日鬧無綫電視係cctvb，主席陶君行噚日為無綫平反，話周日無綫有關六四遊行同民主女神像被搶嘅新聞報道都算詳盡，笑言可能係佢哋積極監察嘅成果喎。