上禮拜五花旗股市下跌，港股噚日雖然跟跌，但係交投好靜，全日埋單唔夠480億元。恒指最後跌1點收市，單日嘅走勢冇乜啟示，但係睇埋早幾日嘅走勢，家係升後整固，等消息突破。
花旗股市噚晚休市，噚日A股表現麻麻，今朝如果企番穩，港股可以造好啲，不過成交睇嚟都係會偏靜。
國泰C輪19345：國泰（293）噚日報收15.42元，升2.7%。股價微穿20日線，技術走勢進一步轉強，成交亦配合，有機升破15.9元推向16.8元間，可以諗吓隻C輪19345，隻輪現價18.2仙，2010年10月5日到期，行使價15元，溢價9.08%，引伸波幅45.11%，有效槓桿率5倍，正股見16.8元，19345睇27.3仙，正股跌穿14.8元，就沽咗隻輪。
俊樺