內地4億網民每日做緊乜？從本田車廠工潮網絡動員及維權力量之大可見，網上發展已由網遊主導，變為社交網站當道。
按Google統計，全球1000個熱門網站，最多人去嘅係Facebook，其次係Yahoo、Live.com及維基百科。內地有7個網站都入圍前20名，包括百度、QQ、新浪、網易、淘寶、搜搜及優酷。
內地網站以百度最紅，4月份全球排名第8，瀏覽人次2.3億人，總共看了270億個分頁。騰訊（700）旗下的QQ都唔差，排名第9，到訪人次1.7億，所睇嘅網頁數量卻有250億頁之多。由於用百度的人主要是搜尋資料，搵完就走；然而社交網瀏覽頁面之多，足以反映用戶在電腦面前花上更多時間。
社交網想賺錢，要保住人氣卻非想像中容易。以前有紅極一時的ICQ，紅了數年後因為只得英語版本，好快被微軟的MSN取代。今時今日嘅Facebook大熱，平均每日新增用戶55萬，可是形象正受考驗，地位岌岌可危。
競爭劇研發成本高
網民信任Facebook，可是公司卻出賣個人資料換取商業利益，結果就如情侶分手，反目成仇。有網民發起在今日取消喺Facebook戶口活動，抗議保障私隱不善，出賣網民利益，至今約有2萬多人響應。有網民甚至不滿Facebook過濾用戶相片，另起爐灶搞咗個「Skinbook」，抗議唔畀放裸照。雖然有啲無厘頭，但推出天體版「Skinbook」以來，竟然吸引數以千計人流慕名而來享受網上的「阿當夏娃」世界。
除了社交網面臨樽頸，網遊同樣進入汰弱留強的階段。金山軟件（3888）剛公佈首季業績，少賺11%，每戶月費收入（ARPU）跌半成至36元人民幣，可見網絡遊戲的生命周期越來越短，玩家玩到悶就好快流失。網上遊戲就好似賣座電影般，可遇不可求，然而投入研發的成本卻與日俱增，毛利進一步受壓，網遊股的高增長期已過。
騰訊早前明言，網遊市場競爭激烈，未來要加大廣告及互聯網增值服務發展，方有機會突圍而出。投資者若想撈底，網遊股都係要小心啲，反而博反彈選騰訊的勝算較高。
唔放心，不妨開QQ出嚟睇睇與Facebook相似度有幾高，就足以解釋點解騰訊可繼續保持高增長。
胡孟青